Тывада уругларның чайгы дыштанылгазынга 170 лагерьни белеткээр

09.04.2022 Тываның баштыңы Владислав Ховалыг чайгы үеде организастыг дыштанылгаже уругларны хөйү-биле хаара тудар даалганы Өөредилге яамызынга тургускан. Аппарат хуралында кадыкшылга кампаниязынга белеткел айтырыгларын сайгарган. Өөредилге болгаш эртем сайыды Алексей Храмцовтуң дыңнатканы-биле алырга, дыштанылга лагерьлериниң башкылары июнь 1-ден уруглары хүлээп алыр. Эрткен чылга деңнээрге элээн хөй, 170 лагерьни ол үеге чедир белеткээр. 148 - хүндүскү, 19 – хоорайдан дашкаар, 3 – майгын лаерьлери ажылдаар. Оон аңгыда «Артек», «Океан», «Смена» база «Орленок» бүгү-российжи уруглар төптеринче 70 путевканы республикада берген. Чайгы лагерьлерге 17,5 муң уруглар, азы шупту школачыларның дөрт кезии дыштаныр. Эрткен чылын пандемия уржуундан, чүгле 7,6 муң дыштаныр кылдыр кызыгаарлаан турган. Уругларның көвей кезии Тывага дыштаныр. Хүндүскү лагерьлер 13 муң хире кижини дыштандырар. А хоорайдан дашкаар лагерьлерге 4,5 муң уруг дыштаныр хонуктарын эрттирер. Барыын-Хемчик кожуунда үш майгын лагерин 60 уругга белеткээр. Хүндүскү лагерьлер июньнуң 1-ден, хоорайдан дашкаар лагерьлер – июньнуң 10-дан, майгын лагерьлери июнь 15-те уругларны дыштандырып эгелээр. Кызыгаар-шеглээшкиннерни ап каапкан-даа болза, санитарлыг чурумнары сагыыр албан дээрзин республика баштыңы уруглар дыштанылгазының организаторларынга сагындырган. Ынчангаш эмчилер уруглар-биле ажылдаар ажылдакчыларның эмчи шинчилгелеринче база албан салдырар тарыышкыннарынче кичээнгейни салыры чугула.