Өгбелерниң изин салгаан эрес-дидим эрлер Донбассче аъттаныпкан

07.04.2022 Чурттуң Президентизи Владимир Путинниң туружун, Россияның Чепсектиг күштериниң хөделиишкиннерин деткип, Донбассты хостаар дээн дайынчы операцияга киржир күзелин он-он тыва эрлер илереткен. Шериг комиссариаттары күзелдиг кижи бүрүзүн албайн турары билдингир. Бо удаада кадыкшыл байдалы эки, шериг хүлээлгезин эрттирген, тускай белеткелдиг кижилер шыңгыы шилилдени эртип, ада-чуртун, акы-дуңмалышкы чонну камгалаар ыдык хүлээлгеже аъттанган. Дүүн, Кызылда Тыва эки турачылар тураскаалының чанынга, тыва дайынчыларны үдеп, чагыг-сөстү бээр дээш чону чыглып келген. “Тыва чоннуң эң-не төлептиг оолдары бөгүн чоруп турар. Ада-чурттуң Улуг дайынының эки турачылары – боттарының өгбелериниң дайынчы алдар-адының төлептиг салгакчылары, эрес-дидим, коргуш чок болгаш шиитпирлиг эрлерни үдеп тур бис. Дайынчы хүлээлгеңерни төлептиг күүсеткеш, төрээн чериңерже онча-менди чанып келир силер. Тиилелге-биле!” - деп,Тываның Баштыңы В. Ховалыг чугаалаан. Эки турачылар тулчуушкун шөлүнче дорт барбас, а бандеровчу националистерден хосталган хоорай, суурларны камгалаарынга үлүг-хуузун киирерлер. Бо хонуктарда Тывадан эмчи бригадазы база Украинаже аъттаныпканын сагындыраал. Олар бистиң солдаттарывыска база тайбың украин чонга боттарының дузазын көргүзерлер. Орук-суур менди, айыыл-халап ойлап, үүле-херек бүдүнгүр-ле чоруур болзунам!