Башкыларның профессионал мергежил мөөрейлериниң республика чадалары эгелээн

04.04.2022 Бөгүн найысылал Кызылда, Аныяктар өргээзинде, башкыларның профессионал мергежил мөөрейлериниң республика чадазы эгелээн. Ук мөөрейлер апрель 4-те эгелээш 9-туң хүнүнде дооступ, тиилекчилерни илередир. Башкыларның профессионал мергежилиниң мөөрейлеринде тос конкурс кирген, ооң бирээзи – республиканыы болур. Бүгү-российжи деңнелдиг – “Тыва Республиканың чылдың башкызы – 2022”, “Тыва Республиканың чылдың кижизидикчи башкызы – 2022”, “Төрээн болгаш орус дылдар башкыларының бүгү-российжи мастер-клазы-2022”, “Тыва Республиканың психолог башкызы – 2022”, “Кижини кижизидери - 2022”, “Тыва Республиканың чылдың директору – 2022”, “Тыва Республиканың чылдың мастери – 2022” мөөрейлерде республиканың башкылары мөөрейлежип эгелээн. Тыва Республиканың Өөредилге яамызының тургусканы “Тыва Республиканың лидер - тулган эр башкызы база дагдыныкчызы – 2022” мөөрей эр башкыларның алдар адын бедидип, арга-дуржулгазын нептередип, аныяктарга үлегер-чижекти бээрин демдеглээр апаар. «Чылдың башкызы -2022» бүгү-российжи конкурстуң киржикчилери, организаторлары болгаш аалчылары, шупту 185 кижиге байырны чедирип көрейн. Шупту киржикчилер амгы үениң технологияларынга чаартыкчы, тывынгыр, тускайлаңын көргүзүп, мөөрейниң шылгалдаларын төлептиг эрте бээринге бүзүрээр мен. Ажыктыг арга-дуржулгаларын солчуп, башкыларның улуг ниитилелиниң кезии дээрзин бадыткап, амыдыралчы болгаш профессионал шын шилилгени кылганынга база катап бүзүредири – бо мөөрейниң эң кол шынары. Мөөрейниң киржикчилеринге база республиканың шупу башкыларынга күш-ажылы, чогаадыкчы дилэшкинери болгаш эгелээшкиннери, тура-соруу болгаш уругларга ынакшылы дээш четтиргеним илереттим. Чедиишкиннерни база чаа-чаа бедиктерни силерге күзедим, хүндүлүг коллегалар!» - деп, Тываның өөредилге сайыды Алексей Храмцов мөөрейни ажыткан.