Тываның Баштыңы Владислав Ховалыг самбога делегейниң чемпиону Саян Хертек-биле ужурашкан

01.04.2022 Тываның Баштыңы Владислав Ховалыг Россияның алдарлыг спорт мастери, самбога Россияның чеди дакпыр чемпиону, делегей кубогунуң эдилекчизи, делегей чемпиону Саян Хертек-биле ужурашкан. – Тываның алдар-аттыг спортчуларының бирээзинге самбо хүрешке Саян Хертек хамааржыр. Амгы үеде ол Москвада чурттап турар, ынчалза-даа төрээн черин черле утпайн чоруур. Ооң төрээн республиказынга спортту, ылаңгыя самбону сайзырадыр дээн саналын деткидим. Тываның Спорт яамызы чүгле самбо мөгелеринге чаа спорт залын белеткеп турар. Уругларны өөредир тренеривис база бар-дыр. Саян – Россияның алдарлыг спорт мастери, самбога Россияның чеди дакпыр чемпиону, делегей кубогунуң эдилекчизи, самбога делегейниң чемпиону. Бо хүннерде ол республиканың аңгы-аңгы булуңнарынга чедип, оолдар, уругларга мастер-классты эрттирер. Алдарлыг спортчуну олар четтикпейн манап турар. Мени бистиң спортчуларывыстың биче сеткилдии магададып турар. Сээң мурнуңда делегей чергелиг кижи олурар, ынчалза-даа чугаалажы бээриңге – эмин эрттир биче сеткилдиг. Эң-не кол чүүл – кижи болуп артары. Алдарлыг чаңгыс чер-чурттуувустуң эгелээшкинин деткиир бис – деп, Владислав Ховалыг социал четкилерде бодунуң арынында бижээн.