Тывада кадыг коммунал боктар сөөртүр регион операторун ажылындан халап болур

31.03.2022 Тываның Чазаа кадыг коммунал боктар чыып, сөөртүп турар регион операторунуң статузун чок кылыр чурумну бадылаан. Кадыг коммунал боктарны чыып, сөөртүрүнүң чаа чурумунга даянып, ооң ажылын соксадып болурун ында айыткан. Чурумда айыттынган ийи фактыны чыл дургузунда хажытканынга база чоннуң хомудалдарынга даянып, санкцияны ажыглаары чедер деп, документини белеткеп кылган республиканың Арга-арыг ажыл-агый база бойдус ажыглалының яамызы демдеглээн. Бир эвес бок үндүр сөөртүр схема болгаш дугурушкан банк магадылалдары күүсеттинмээнде, кады ажылдап турар бүдүрүлгелеринге өрелерлиг апарганда, оператор-биле керээни үзүп болур. Регион оператору-биле кады ажылдаарын соксаткан арга-дуржулга Тывада бар. Красноярск хоорайдан «СТ-ТБО» компания республикада бок сөөртүр ажылды 2018 чылдың августан чорудуп турган. Компания 2020 чылдың марттан тура орулгалар чедир албайн, карылгалыг ажылдап эгелээш, ажылын ара соксаткан. Кызыл хоорай мэриязы онза байдал чурумун чарлаан турган. ЧКА адырын харыылап турган республиканың Тудуг яамызы байдалды оон ыңай сандаратпас дээш, бодунуң дужаалы-биле «СТ-ТБО» компанияның регион оператору статузун соксадып, конкурс-биле өске организацияны хаара тутканын сагындыраал.