Тываның школалары апрельдиң 1-ден уруглар бижидилгезин эгелээр

29.03.2022 Тывага бирги классче бижидилге апрельдиң 1-де эгелээр. РФ-тиң Чырыдыышкын яамызының 2020 чылдың сентябрь 2-де № 458 дужаалында бадылаан чаа чурум-биле хүлээп алыышкынны организастаар. 6,5-8 харлыг чаштарны бирги классче бижидип эгелээр. Ада-иениң билдириишкининге даянгаш, уругнуң школа кирер хары шала эрте азы орайтадыр хүлээп болур. Хүлээп алыышкынны ийи чадага эрттирер. Школаже бир дугарында кирер эргелиг болгаш школага быжыглаан девискээрде чурттап турар уругларны апрельдиң 1-ден июнь 30-ге чедир бижидер. Ол школада өөренип турар кады төрээн угба, акылыг, школа чанында чурттап турар уругларны, ол ышкаш дужаалда кирген албан черлериниң ажылдакчыларының база шериг албанныгларның ажы-төлүн бирги үе-чадада хүлээп алыр. Июль 6-дан сентябрь 5-ке чедир хостуг олуттарны көрүп, хүлээп алыышкынның ийиги чадазы эртер. Быжыглаттынган девискээрде чурттавайн турар ажы-төлге ол көрдүнген. Ийиги чадазында күзелдиг ада-иелер билдиришкинни киирерге, хостуг олуттарны көрүп, хүлээп алыр. Тыва Республиканың Өөредилге яамызының баш бурунгаар санаашкыны-биле алырга, бо чылын бирги классче 6 335 чаштар кирер (2021 чылда - 7 184 кижи).