Тывада “Улусчу картофель” төлевилел апрельдиң 1-ден ажылын эгелээр

29.03.2022 Тыва Республиканың Баштыңы Владислав Ховалыгның даалгазы езугаар, 2022 чылдың апрель 1-ден Тывага “Улусчу картофель” губернатор төлевилели ажылын эгелээр. Тыва Республиканың Чазааның хөй ажы-төлдүг болгаш эвээш орулгалыг өг-бүлелерни деткээн кризиске удур хемчеглериниң бирээзинге “Улусчу картофель” төлевилел хамааржыр. Онза хереглелдиг хөй ажы-төлдүг база эвээш орулгалыг өг-бүлелерге картошка үрезинин болгаш “борщ түүн” дамчыдып бээри – төлевилелдиң сорулгазы. Төлевилелди ТР-ниң Күш-ажыл блгаш социал политика яамызы, ТР-ниң Көдээ ажыл-агый болгаш аъш-чем яамызы удуртуп, хайгаараар болза, кожууннар болгаш хоорайлар чагыргалары - ооң кол күүседикчилери. Бөгүн Тываның Чазаанга, Тыва Республиканың Чазааның даргазының оралакчызы Елена Хардикованың удуртулгазы-биле, “Улусчу картофель” төлевилелди күүседириниң айтырыгларынга семинар-хурал болуп эрткен. Семинарда республика чазаанда төлевилелдер ажыл-чорудулгазының талазы-биле эргелелдиң начальниги Чечек Артна, республиканың күш-ажыл болгаш социал политика сайыдының оралакчызы Чечена Дудуп, көдээ ажыл-агый болгаш аъш-чем сайыдының оралакчызы Владимир Алдачи, саң-хөө сайыдының оралакчызы Ирина Орлова боттуг арга-сүмелерни берген. ТР-ниң Күш-ажыл яамызының 2022 чылдың январь 1-ниң сан-чурагайлары-биле алырга, республикада шупту 85 330 өг-бүле бар, оларның 22,3 хуузу, азы 19025-и эвээш орулгалыг өг-бүлелерге санадыр. Муниципалдыг тургузугларның дотация акша-хөреңгизи-биле “Улусчу картофель” төлевилелге киржир эвээш орулгалыг 12355 өг-бүлеге картошка үрезинин үлээри көрдүнген. Республика бюджединден 8,7 млн. рубльди ол сорулгага тускайлаан. Тыва Республиканың Баштыңы Владислав Ховалыгның даалгазы езугаар, 2022 чылда «Социал картофель» база «Бажың бүрүзүнге – картофель» төлевилелдерни «Улусчу картофель» деп чаңгыс губернатор төлевилели кылдыр катканын сагындыраал.