2022-2023 чылдарда Тывада эргижирээн оран-савадан хамаатыларны көжүреринге 213 млн ажыг рубльди тускайлаан

25.03.2022 140 хире кижи чаа квартираларынче көжүп кирер. Чурттаары аргажок апарган оран-савадан көжүреринге 2022-2023 чылда 213,68 млн рубльди тускайлаан. «Чуртталга оран-савазы база хоорай хүрээлели» национал төлевилел-биле республиканың чурттакчылары чаа бажыңынарже көжер. Чуртталга-коммунал ажыл-агыйын эде чаартырын кады деткиир фонд – күрүне корпорациязының баштаар чери бо чылдың март 18-те, «Чурттаары таарымча чок чуртталга фондузун эвээжедирин хандырары» федералдыг төлевилел боттаныышкыны-биле саң-хөө деткимчезин бээрин дилээн Тыва Республиканың чагыын деткээн. РФ-тиң субъектилеринде ол төлевилел ажылы-биле, 2017 чылдың январь 1-ге чедир аварийлиг деп санаан бажыңнардан, хамаатыларны өскээр көжүрүп турарын сагындыраал. Тыва ол чагыы езугаар ЧКА Фондузундан 213,68 млн рубльди алыр, а регион бюджединден 2,17 млн рубльди кады акшаландырар. Ол акша-хөреңги-биле келир чылын Чеди-Хөл кожууннуң Хову-Аксы суурга 2,26 муң дөрбелчин метр ниити шөлдүг 50 чурттаар оран-саваны тудар. 138 хамааты ол бажыңнардан чаа квартираларны алыр. Эрткен чылдың октябрьда Тываның Баштыңы Владислав Ховалыг күрүне корпорациязының баштаар чериниң даргазы – чиңгине директор Константин Цицин-биле ужурашкан. Ынчан ол республикага ук программаның боттаныышкынын чедип алырынга херек акша-хөреңгини аңгылап бээрин ЧКА фондузу-биле дугуржуп алган. Ол ышкаш фондунуң өске-даа угланыышкынарында – социал чуртталга тудуунда, коммунал инфраструктура эде чаартылгазында кады идепкейлиг ажылдап турар. Республиканың 5 муң ажыг чурттакчылары чаа, таарымчалыг квартираларын алганын сагындыраал.