Тыва Республиканың социал-экономиктиг хөгжүлдезиниң тускай программазының күүселдези-биле Чедерде ажылдар уламчылавышаан

23.03.2022 2020-2024 чылдарда Тыва Республиканың социал-экономиктиг хөгжүлдезиниң тускай программазын боттандырар хемчеглер күүселдези-биле «Чедер» санаторий-курорт база кадыкшылга комплекизинде тудуг ажылдары кидин-түлүк чоруп турар. 2022 чылдың ийиги чартыында, Тывада сурагжаан «Чедер» курортунда хөлдүң эм шынарлыг дузун, малгажын, минералдыг эмненип ижер база эштир сугларын ажыдары планнаттынган. Бөгүнде Чедер хөлче кирер автомобиль оруунуң септелгези доозулган. Ажык бассейнниг база хөл кыдыынга дыштаныр зоналыг комплекстиг аква-төптү дыштаныкчыларга ажыдар. Чаңгыс каъттыг 6 корпусту тудуп, инфраструктуразын бүрүнү-биле чаартыр. Курорт бүрүнү-биле чаартынган соонда, бир дыштанылга ээлчээнде-ле 400 чыгам кижини хүлээп, кадыкшылын быжыглаар арганы бээрин ТР-ниң Кадык камгалал яамызы дыңнаткан.