2021 чылда Тываның көдээ ажыл-агыйы эки ажылын уламчылаан

23.03.2022 2021 чылдың баш бурунгаар түңнелдери-биле алырга, Тываның көдээ ажыл-агыйының шупту адырында каттышкан продукция 4,4 хууга көвүдээн. Ниитизи-биле 8,43 млрд рубльга ону бүдүрген. Республика Чазаа адырларның отчедун дыңнап, түңнелдерни үндүрген. 2020 чылга деңнээрге, сүттү 3,3 хуу хөйге, азы 67,7 муң тоннаны бүдүрген. Эът бүдүрүлгези 4,7 хууга көвүдеп, 22,2 муң тонна четкен (2020 чылда – 21,2 муң тонна). 2021 чылдың төнчүзүнде шээр малдың баш саны 1254,9 муң болган, ооң мурнунда чылга деңнээрге өзүлде 2,7 хуу. А улуг бода малдың баш саны 1,7 хуу өзүп, 190 муң баш ажа берген. «Кыштаг» болгаш «Чаа сорук» губернатор төлевилелдери малдың баш санын өстүреринге улуг идиглиг болган. Социал керээ-биле боттандырар төлевилелдиң ачызында, республикада 700 ажыг фермер ажыл-агыйлары тургустунган.