Тываның амыдырал-хандырылга болгаш чуртталга-коммунал ажыл-агыйының ажылдакчыларынга күрүне шаңналдарын тывыскан

21.03.2022 Марттың үшкү улуг-хүнүнде, чылдың-на эрттирип турар амыдырал-хандырылга болгаш чуртталга-коммунал ажыл-агыйының ажылдакчызының хүнүнүң бүдүүзүнде, адырның ажылдакчыларын шаңнап-мактаан. Профессионал байырлалга тураскааткан хурал Тыва культура төвүнге болуп эрткен. Тываның Чазааның вице-премьери Александр Брокерт күрүне шаңналдарын тывыскан. «Ажылды билдилиг тургусканындан, республика чурттакчыларының коммунал айтырыглары дарый шиитпирлеттинип турар. Чаагайжыдылга-биле холбашкан төлевилелдерни чедиишкинниг боттандырып турар бис, мурнувуста шиитпирлээр айтырыглар хөй. Силерниң ажыл-ижиңер дээш, улуу-биле четтирдивис» — деп, Брокерт демдеглээн. «Водоканал-Сервис» КХН-ниң материалдыг бөлүк бухгалтери Наталья Бикбаева хөй чылдарда ак сеткилдиг күш-ажылы дээш Россия Федерациязының Тудуг болгаш чуртталга-коммунал ажыл-агый яамызының шаңналын алган. Адырның 95 ажылдакчылары Тыва Республиканың Баштыңының Өөрүп четтириишкин база Хүндүлел бижиктерин, Дээди Хуралдың Хүндүлел бижии дээш, өске-даа шаңналдарга төлептиг болган.