Тывада хөй ажы-төлдүг өг-бүлелер «социал хөмүр» дээш билдириишкиннерни март 31-ге чедир киирип болур

11.03.2022 «Социал хөмүр» төлевилел-биле кадыг одаар чүүл деткимкезин бээринче билдириишкиннер хүлээп алырын 2022 чылдың март 31-ге чедир узаткан. Февраль төнчүзүнге чедир документилерни хүлээп алырын дыңнаткан турзажок, февральдың 25-ке чедир чүгле 2088 билдириишкин кирген. Дөрт болгаш оон хөй ажы-төлдүг 3915 өг-бүлеге дузаны кадары бо чылда планнаттынган.

«Социал хөмүр» губернатор төлевилел чорудуу-биле социал дузаны көргүзүп, бир өг-бүлеге-ле 2145 кг хөмүрнү азы 4,8 куб одаар ыяшты бээри көрдүнген.
Дузаламчы алыр өг-бүледе ада-иениң кайы бирээзи социал дузаламчыны бээр дугайында билдириишкинин кожууннарда Өг-бүлеге болгаш уругларга социал дуза төвүнче, азы Тываның Күш-ажыл болгаш социал политика яамызының удуртулгазында албан черинче, азы дараазында адресте Кызыл хоорай мэриязының Социал политика департаментизинче киирер: 667000, Тыва Республика, Кызыл хоорай, Кочетов кудумчузу, б. 29.

Билдириишкинге дараазында документилерни кожар:
1) ада-иениң боттарын база 14 хардан өрү назылыг ажы-төлүн бадыткаан документилерниң хоолгазы;
2) назы четпээн шупту ажы-төлүнүң (ол ышкаш 14 хардан өрү назылыг ажы-төлүнүң паспорттарының хоолгазындан аңгыда) төрүттүнгениниң дугайында херечилелдериниң хоолгалары;
3) дузаламчы алыр өг-бүлениң кежигүннериниң бажыңның ээзи болганын база ажыглап турарын хоойлу езугаар бадыткаан документилериниң хоолгазы;
4) билдириишкин киирер мурнунда календарлыг сөөлгү үш айда өг-бүлениң орулгаларның дугайында справказы.