Тываның Баштыңы республиканың хөй-ниити организацияларының база политиктиг партияларның төлээлери-биле ужурашкан

11.03.2022 Тываның Баштыңы Владислав Ховалыг Украинаны демилитаризастаар база и денацификастаар хүлээлгени күүседип турар российжи армияны база Президентини деткиири-биле, республиканың политиктери база чурттакчылары каттыжып, аңгылажыышкыннарны уттуптарын кыйгырган. Регионнуң политиктиг партиялар база хөй-ниити организацияларының төлээлери-биле ужуражылгада ооң дугайында ол чугаалаан.

Тускай операция хандыр бодамчылыг кылган албан кылыр базым болганын, Владислав Ховалыг демдеглээн. Ооң төнчү сорулгазы – чүгле Донбасстың чурттакчыларын нацистерден камгалаары эвес. А чугаа - Россияга удур даштыкыдан улуг айыылдың диргелип келгенинде. Кыжаныглар чүгле чуртче угланган эвес, а российжи кижи бүрүзүнге дээп турар. Ынчангаш политиктиг күштер, организациялар азы регионнар аразында демнежип, каттыжары чугула апарган. Өг-бүлелер, девискээрлер, коллективтер, хоорайлардан эгелээш, кижилер боттарының аразында туттунчур херек. Российжи кижи бүрүзү тускай операцияның чарылбас кезээ мен, тиилелгеге дээш шыдаар шупту чүвени бодунуң черинге кылыры - ооң хүлээлгези дээрзин медереп билген турар ужурлуг.

Партияларның регион салбырлары боттарының инициативалары-биле Донбасстың база Украинаның хостаттынган девискээрлериниң чурттакчыларынга гуманитарлыг дузаламчыны база акша-хөреңгини чыып турары билдинген. «Чаңгыс демниг Россия», КПРФ, «Өзүлде партиязы», ЛДПР, Казактар партииязында шак ындыг дузаламчы чыыр боттарының пунктулары бар. Ол ажылды мөөңнеп, ачы-буян акциязының киржикчилер санын көвүдедири-биле, чаңгыс аай төптү тургузар деп ужуражылгада дугурушкан.

Тускай операция үезинде дайынчы хүлээлгезин күүседип тура мөчээн солдаттарның өг-бүлелеринге дузалажыр айтырыгны аңгы чугаалашкан. Партиялар төлээлери дуза кадарынга беленин дыңнаткан. Украинага тулчуушкун үезинде чок болган шериг албанныгларның ажы-төлүн, хайгаарал херек ада-иелерин долу күрүне хандырылгазынче алыр саналды база киирген.

Ужуражылга үезинде, АКШ биле Евроэвилел чурттарының Россияга удур идип үндүрген санкцияларынга удур хөделир айтырыгларны база сайгарган. Бөгүнде ол чүгле политика база экономиканың элиталарынга эвес, а чурттакчы чоннуң эң хөй кезиинге дээп турар. Даштыкылар киришкен бүдүрүлгелерни хаар дээн оралдажыышкыннардан он-он муң российжилер ажылын чидирип ап болурунуң дугайында чугаалаарга-ла, ол чедер.

Чурттуң таварышканы кыжаныгларны ханы билип, оларны кады ажып эрте бээринге белени дээш, чугааның киржикчилеринге республика баштыңы четтиргенин илереткен. Россияга удур экономиктиг, политиктиг, информастыг езулуг шын дайын чоруп турарын ол демдеглээн.

Барыын чүк күрүнелери туруп көрбээн эң дошкун хемчеглерни база аргаларны ажыглап турары, Россияны шуут базып, чок кылып каар дээн дайын дээрзин бадыткап турар. Оон өске сорулга оларда чок.

«Президентивисти, армиявысты деткип, сырый каттыжып, чурттуң эрге-ажыын быжыг болгаш туруштуг камгалап, күчүлүг иштики курлавырга даянмышаан, бурунгаар шимчээри – бистиң харыывыс ол. Бирги ээлчегде, иштики аргаларга база курлавырларга, ол ышкаш, Россияның хөй националдыг чонунуң тура-соруунга, күчү-күжүнге база улуг хей-аъдынга» - деп, Владислав Ховалыг чугаалаан.