Тыва Республика КЭФ-2022-де кызыгаар регионнуң транзит курлавырын таныштырар

28.02.2022 Марттың 2-4 хүннеринде, Красноярск хоорайга эртер Экономиктиг шуулганга (КЭФ) Тывадан делегация база киржир. Республикнаың төлээлери «Хандагайты (Россия) – Улангом – Ховд (Моол) – Урумчи (Кыдат)» транспорт оруунуң дугайында дыңнадыгны «Делегейниң транспорт угланыышкыннары. Россияның транзит курлавыры база транспорт ачы-дузазының экспорту» шөлчүгешке кылыр. Регион Баштыңы Владислав Ховалыгның чугаазы-биле алырга, шуулганга киржилге – бистиң республиканың социал-экономиктиг хөгжұлдезинге улуг идигни берип болур хире сонуургалдыг кижилерниң кичээнгейин хаара тударынга эптиг арга. Бо чылын шуулган «Сибирь: келир үениң экономиказы» деп темалыг эртер. Дискуссияларның кол шөлчүгежи - Сибирьниң федералдыг университеди. Шуулганда таныштырлагларны база делгелгелерни киирген, элээн каш дугуржулгалар чардынар ужурлуг. Красноярскиниң экономиктиг шуулганының хемчеглери онлайн болгаш оффлайн хевирлиг эртер. Сибирьге эртем-үлетпүрнүң база экономиканың төвү апаар чаа хоорайларны тудар дээн С.К. Шойгунуң саналынга даянып, Ангара-Енисей макрорегионну тудар мурнады хөгжүдер стратегияны шуулганга сайгарарын организаторлар дыңнаткан. Өөредилге, культура, спорт база гастрономия программаларын каттыштырган КЭФ-ФЕСТ чаа төлевилел, экономика эртеминге улуг үлүг-хуузун киирген эртемденнерге премияларны тыпсыры, Красноярскиниң келир үеде овур-хевирин сайгарып чугаалажыр аныяктар шөлчүгештери бо чылын эртер шуулганда чаа чүүлдер. КЭФ-2022-ге күзелдиг кижи бүрүзү шуулганның https://kef-2022.ru/ сайтызынче киргеш, онлайн арга-биле киржип болур.