Тывада национал төлевилелдер боттандырылгазының 2021 чылда түңнелдерин үндүрер

28.02.2022 Февральдың 28-тен март 5-ке чедир, Тывага Национал төлвелелдер неделязы болуп эртер. Тываның Баштыңының чанында Стратегтиг хөгжүлде болгаш регион программаларының талазы-биле чөвүлелдиң хуралында, 2021 чылда республикага национал төлевилелдерни боттандырганының түңнелдерин үндүрүп, 2022 чылда сорулгаларны салыр. Регион яамылары база муниципалдыг чагыргалар боттарының интернет курлавырларынга база МИЧ-терге национал төлевилелдерни амыдыралга боттандырганының үре-түңнелделдерин база регионнуң социал-экономиктиг хөгжүлдезинге ооң салдарының дугайында чырыдар. Неделяның хүн бүрүзү бир национал төлевилелдиң дугайында болур болгаш, республиканың чурттакчылары 2021 чылда федералдыг программаларны күүсеткенинден кандыг социал ужур-дузалыг түңнелдерни алганын билип алыр аргалыг. Тывада национал төлевилелдерни 2019 чылдан бээр боттандырып эгелээнин сагындыраал. Россия Федерациязында боттандырып турар 13 национал төлевилелдерниң: «Демография», «Өөредилге», «Кадык камгалалы», «Чуртталга оран-савазы база хоорай хүрээлели», «Экология», «Айыыл чок, шынарлыг оруктар», «Күш-ажылдың бүдүрүкчүлүү», «Чурагайлыг экономика», «Культура», «Делегей кооперациязы база экспорт» болгаш «Биче болгаш ортумак сайгарлыкчы чорук база хууда сайгарлыкчы эгелээшкинни деткиири» деп 11 төлевилелдерге республика 2021 чылда киришкенин сагындыраал. Национал төлевилелдер боттандырылгазы-биле республикада оруктарны тудуп, септеп, чаагайжыдылга, инфраструктура объектилерин тудуп, культура, спорт, өөредилге объектилерин чаартып, кадык камгалал системазын модернизастап, чурагайжыдылганы шапкынчыдып, биче болгаш ортумак сайгарлыкчы чорукту, көдээ бараан бүдүрүкчүлерин деткип, чоннуң амыдырал байдалын экижидер өске-даа хемчеглерни чорудуп турар. 2021 чылда национал төлевилелдерни ниитизи-биле 4 миллиард 400 миллион рубльге, ооң 4 миллиард 300 миллион рублин федералдыг бюджеттен, 100 миллион рублин регион бюджединден акшаландырган. Тывада национал төлевилелдер боттаныышкынының дугайында тодаргай медээлерни ВКонтакте https://vk.com/public194815300 «Тыва Республиканың төлевилелдери» арындан номчуп болур.