Тывада часкы үерге белеткел эгелээн, 12 муниципалдыг тургузуг айыылдыг зонада

22.02.2022 Тываның гидрометеорология болгаш долгандыр хүрээлел шинчилелиниң республика төвү бо кыжын Каа-Хем, Чеди-Хөл кожууннарда база Кызыл хоорайда хар хөй болганын, а өске черлерде хар өй-тап дүшкенин дыңнаткан. Россияның ОБЯ хөй чылдарда хайгааралындан алгаш көөрге, Тывага апрельдиң ийиги, үшкү он хонуктарында хемнер-суглар ажыттынып, доштар бадып эгелээр. Тываның Баштыңы Владислав Ховалыг часкы үерлээшкинге удур хемчеглерни ам эгелээрин айтыкан. ХК база ОБ албаны суг объектилеринге чоннуң канчаар алдынарын, доштап автотранспорттуң база кижилерниң аргыжылгазынга тайылбыр ажылдарын кылырын ол дааскан. Бо чылын Каа-Хем (Сарыг-Сеп суур), Тере-Хөл (Кунгуртуг), Тес-Хем (Шуурмак), Эрзин (Мөрен), Бии-Хем (Туран), Таңды (Сосновка), Чаа-Хөл (Ак-Дуруг), Чөөн-Хемчик (Чадаана, Бажың-Алаак, Теве-Хая), Тожу (Ий), Бай-Тайга (Шуй, Бай-Тал), Чеди-Хөл (Ак-Тал) база Улуг-Хем (Арыскан) кожууннар девискээрлеринге чайындылар үнери магатчок. Майның ийиги чартыындан июнь ортанга чедир, Улуг-Хем, Бии-Хем, Каа-Хем база Хемчик хемнерниң суу көдүрлүп, чурттакчылыг 11 пунктуну – Кызыл хоорайны, Каа-Хем суурну база Оттук-Даш арбанны, Сарыг-Сеп, Дерзиг-Аксы, Элегес, Сыстыг-Хем, Кара-Хөл, Суг-Аксы, Алдан-Маадыр болгаш Кара-Чыраа суурларны суг ап болурун синоптиктер баш бурунгаар дыңнаткан. Республиканың Арга-арыг ажыл-агыйы база бойдус ажыглалының яамызы үерлээшкин үезинде бооп болур онза байдалдарны чайладыры-биле, 4 503 кижини, 1 032 санныг техниканы, 39 эштир чүүлдерни, бир эвес онза байдал болу берзе, 141 санныг тускай техниканы хаара тударын планнаан. 12 000 кижиге түр үеде чурттаар 114 пунктуну белеткээр. Ведомство Россияның Камгалал яамызының Төп Шериг округу-биле хемнерде тырлы берген доштарны бадырарынга чазылдырар ажылдарже 55-ки мотоадыгжы бригаданы хаара тударын дугурушкан. Эрткен чылын республика девискээринге үргүлчүлелдиг чаъстар чагганындан база чайынды суу үнгенинден чеди онза байдал болган, 492 бажың когараан, 1964 кижи каражалаан. Когаралдың болгаш материалдыг чидиригниң ниити хемчээли 68 ажыг млн рубль болган.