Тываның халдавырлыг аарыглар эмнелгезинге 2021 чылда ажылының түңнели-биле 6 млн рубльдиң сертификадын тывыскан

21.02.2022 Регионнуң Баштыңы Владислав Ховалыг кадык камгалал яамызының түңнел коллегия хуралының үезинде, ажылынга шылгараан эмчилерге күрүне шаңналдарын тывыскан. Кадык камгалал сайыды Анатолий Югай эмнелге организацияларның чылдың рейтинг түңнелдерин үндүрүп, шылгараан албан черлеринге дериг-херексел садып алыр сертификаттарны тывыскан. Россия Федерациязының «Кадык камгалалының тергиини» хөрек демдээ-биле дараазында эмчилерни шаңнаан: Гольцова Светлана Александровна – Республиканың 2 дугаар эмнелгезиниң рентгенолог эмчизи; Данзырык Анчыгаш Сарыг-оолович – Республиканың 1 дугаар эмнелгезиниң травматология салбырының эргелекчизи, травматолог-ортопед эмчи; Монгуш Херелмаа Дагбаевна – Республиканың 1 дугаар эмнелгезиниң Регионнуң хан-дамыр төвүнүң удуртукчу. «Тыва Республиканың алдарлыг эмчизи» хүндүлүг атты Республиканың 1 дугаар эмнелгезиниң функционалдыг диагностика эмчизи Спирина Айлан Куусаловнага тывыскан. Тыва Республиканың Баштыңының Хүндүлел бижии-биле: Обухов Андрей Петрович – Республиканың кеш-шээр аарыглар диспансериниң кол эмчизиниң оралакчызызын; Кудерек Римма Чыскаал-ооловна – Республиканың 1 дугаар эмнелгезиниң нейрохирург эмчизин; Хомушку Сайдай Алексеевна – ТР-ниң эмчи-социал айтырыглар болгаш удуртулганың эртем-шинчилел институдунуң Мергежил бедидер төптүң удуртукчузун; Ооржак Валентина Алдын-ооловна – Өвүрнүң ТКЭ поварын; Ондар Оюмаа Дадар-ооловна – Республиканың онкология диспансериниң радиотерапевт эмчизин шаңнаан . Эмнелге организацияларының чыл санының рейтинг түңнели-биле, Республиканың халдавырлыг аарыглар эмнелгезинге 6 млн рубльдиң сертификадын чаа коронавирус халдавыры-биле демисежир аппараттар садып алыр кылдыр тывыскан. Эмнелгениң тургузуунда Хөй ажыл-чорудулгалыг эмнелге төвү ажылдап турар. Халдавырлыг аарыглар эмнелгезинде шупту 314 орунну салган. Эрткен чылда 9 830 аарыг кижини эмнээн, ооң мурнунда чылга деңнээрге ийи катап хөй. Чаа коронавирус халдавырындан аараан 6 736 кижини эмнээн, шупту эмнеткен кижилерниң 68 хуузу, азы ооң мурнунда чылдан 1,6 хөй. Эмнелгениң клиниктиг-диагностика лабораториязы 113662 анализти хынаан, херел-биле диагностика салбырында ИЗИ,КТ база рентгенге 25 муң ажыг шинчилелдерни кылган. 2021 чылдың түңнелдери-биле Республиканың уруглар эмнелгези III деңнелдиң эң эки эмнгелге организациязы деп атка төлептиг болуп, 4 млн рубльдиң сертификадын алган. Республиканың СПИД болгаш халдавырлыг аарыглар-биле демисел төвү 2021 чылдың түңнелдери-биле II деңнелдиң эки эмнелге организациязы деп атка төлептиг болуп, 3 млн рубльдиң сертификадын алган. 2021 чылдың түңнелдери-биле Мөңгүн-Тайга кожууннуң төп эмнелгези I деңнелдиң эки эмнгелге организациязы деп атка төлептиг болуп, эмнелге дериг-херекселдерин садып алырынга 1 млн рубльдиң сертификадын алган.