Тывада COVID-19-тан коллективтиг иммунитет 83 хуу четкен

15.02.2022 Республиканың кол санитар эмчизи Людмила Салчак чазактың аппарат хуралында ооң дугайында дыңнаткан. Чаа коронавирус инфекциязындан 165 000 кижини тарыыр тургаш 90,5 хуу чедирип, 150 047 кижиге тарылганың бирги кезээн салган. Республика тарыышкын планын күүседир талазы-биле субъектилер аразында рейтингиде алдыгы черде. Чурттакчы чонга бирги тарыышкынны доозуп, ревакцинацияны үезинде салып, ук көргүзүгнү бадырбас ужурлуг. Ындыг болзажок, COVID-19 тарыышкынынче чонну чедир хаара тутпайн турар муниципалитеттер база бар. Оларга Кызыл хоорай хамааржыр, тарылга планын чүгле 86,1 хуу күүсеткен (планы – 66 929, тарааны – 57 608). Барыын-Хемчик кожуун - 82,8 хуу (планы – 12 129, тарааны – 10 038), Эрзин кожуун тарыдар ужурлуг кижилерниң 73,1 хуузун тараан (планы – 4 179, тарааны – 3 449). Ук муниципалдыг тургузугларның удуртукчуларынга тарылга кампаниязын шапкынчыдып, тарыткан болгаш катап база тарыткан чоннуң учедун кылыр даалганы берген. Чурттакчы чонну ажылга хаара тудар төптүң учедунда ажыл чок кижилерже онза кичээнгейни углаарын база сагындырган. Февраль 13-те, Тывада, COVID-19-тан аараан 346 таварылга илеерттинген. Эрткен неделяда халдавырның тарап нептерээниниң коэффициентизи 1,2 турган болза, ам 0,7 апарып, халдавыр чавырылганын көргүскен. Эрткен неделяда 19 муниципалдыг тургузугда 3 351 кижиниң аараанын лаборатория бадыткаан, ооң мурнунда неделяга деңнээрге, 357 кижи эвээш. 10 802 аарыг кижи эмнедип турар, эрткен недеялга деңнээрге 10 080 кижи эвээш ( февраль 6-ныы-биле – 20 882 кижи турган), 142 кижиниң байдалы берге.