Тывада эмнелге организациялары аарыг кижилерни план езугаар хүлээп эгелээр

14.02.2022 Республиканың кол санитар эмчизи Людмила Салчак 2022 чылдың февраль 15-тен эмнелге албан черлери чонну план езугаар хүлээп ап эгелээр саналды киирген. Чаа коронавирус халдавырындан аарыыр чоруктуң саны хүн бүрүде эвээжеп эгелээни-биле, ооң мурнунда хүлээп алган кызыгаарлаттынган хемчеглерниң чамдыызын суларадып болурун чугаалаан. Эмнелге организациялары-биле чергелештир, күрүне болгаш мунициапалдыг ачы-дуза көргүзер хөй ажыл-чорудулгалыг төптер база Чонну ажылга хаара тудар төптер баш удур бижидилге-биле хамаатыларны хүлээп эгелеп болур. Ооң мурнунда эпидемиологтуг байдал хенертен баксырай бээрге, хамаатыларны хүлээп алырын 2022 чылдың апрель 1-ге чедир түр када соксаткан турган. Республиканың кол санитар эмчизи кандыг байдалда МФЦ-лер бижиткен кижилерни хүлээп ап эгелээрин тодараткан. Хүлээп алыышкында келген кижилерни баш бурунгаар бижиткени езугаар, ниити шөлдүң 50 хуузу хире долдуруп, хүлээр. МФЦ-же кирерде чаа коронавирус халдавырынга удур тарыткан соонда, «Госуслугиден» алган QR-кодун, азы сөөлгү чартык чылда аарып каапканын, ПЦР-тестизи анаа болгандан бээр 48 шак четпээнин шынзыдып көргүзер. Шак-ла ындыг негелделерни Чонну ажылга хаара тудар төптер сагыыр. Дыка хөй күрүне ведомстволарының ажылын бо берге үеде түр соксаткан турган, а хамаатылар бот-хоргадал чурумун сагып, бажыңнарындан үнмейн, күрүне ачы-дузаларының чаңгыс аай порталы - gosuslugi.ru таварыштыр күрүне болгаш муниципалдыг ачы-дузаларны долдуруп болурун Тываның Чурагайлыг хөгжүлде яамызы сагындырган. Январьның 7-ден февраль 13-ке чедир, Тывада ковидтен 3351 кижи аараан. А январьның 31-ден февраль 6-га чедир - 3708 кижи.