Тываның школачылары эпидемиологтуг байдалдың баксырааны-биле шупту ырактан өөренир хевирже шилчээн

30.01.2022 Тываның Чазаа январь 30-де, шупту школачылар база ортумак тускай өөредилге черлериниң сургуулдары январьның 30-ден февраль 7-ге чедир ырактан өөренир дугайында шиитпирни үндүрген. Регионда эпидемиологтуг байдалдың нарыыдааны-биле ындыг шиитпир хүлээп алдынган. 9-11 класстарның өөреникчилери бо хүнге чедир школага барып өөренип турганнар. Эрткен хонукта Тывада коронавирустан аараан 407 таварылга илереттинген, оларның иштинде 143 уруг аараан. «Республикада чамдык класстар база школалар ырактан өөренир кылдыр шилчээн. Хамчык аарыындан кижилерниң, ылаңгыя уруг-дарыгның кадыын камгалаар дээш эң-не щыңгыы хемчеглерни алырын үе негеп келген. Понедельниктен, январь 31-ден, шупту школачылар база сургуулдар бажыңнарындан өөренир» - деп, республика баштыңы Владислав Ховалыг социал четкилерде бодунуң арынынга дыңнаткан. Мооң мурнунда клазында азы школазында ковидтээн уруглар бар болза, ырактан өөренир кылдыр шилчидип турган. Ам шупту школаларны база ортумак тускай өөредилге черлерин февраль 7-ге чедир ырактан өөренир кылдыр албан езузу-биле чарлаан. Улуг кижилерге ырак турарының чурумун, маска кедер, үезинде тарылганы кылдырар дээн ышкаш, камгалал хемчеглерин сагыырын сүмелээн. Росхереглел хайгааралының сүмелеринге даянгаш, Тываның күрүне университединиң удуртулгазы студентилерниң өөренир хевирин боттары шиитпирлээр. Январь 30-ниң эртенги медээзи-биле алырга, COVID-19 чыпшынган 313 таварылганы лаборатория бадыткаан. Кызылдың эмнелгелеринде 1122 кижи эмнедип чыдар, оларның 131-и иштиг херээженнер болза, 168 бичии уруглар бар. Эрткен хонукта 213 кижини эмнелгеден үндүр бижээн. Хостуг орун фондузу - 18,2%. шупту 1296 оруннар бар, ооң 300-ү кожууннарда. Чеди эмнелге албан черлериниң Сall-төпетеринде 63 операторлар ажылдап турар, эрткен хүнде 4875 дыңнадыг кирген. Дөрт лаборатория бир хонук дургузунда 6567 ПЦР-тестилерни хынаан. Вакцинаның I кезээн – 147 672 кижи алган, ооң санында 36541 кижи чаңгыс салыр Спутник лайт-биле тарыткан. Долу тарылганы 100032 алган. Дагын катап салыр тарылганы 37369 кижи салдырткан.