Тываның Кадык камгалал яамызы Covid-19-тан аараан уругларның ада-иелеринге сүмелерни берген

27.01.2022 Эрткен хонукта республикада коронавирустаан 310 кижи демдеглеттинген, оларның үш кезии - бичии уруглар. Кызыл хоорайда - 147, Кызыл кожуунда 39 уруг аараан. Ооң мурнунда хүнге бодаарга, муниципалитеттерде аарыг кижилер саны көвүдээн. Барыын-Хемчик кожуунга дүүн 3 кижи аараан турган болза, бо хүнде 17 кижи, а Бии-Хем кожуунга бир кижи турган болза, бөгүнде 23, Чаа-Хөл биле Чеди-Хөл кожууннарда ийи биле чаңгыс турган болза, бөгүн 12-12 аарыг кижи демдеглеттинген. Лабораториялар эрткен хонукта 4145 ПЦР-тести кылган. Эрткен хонукта аараан кижилер санында 17 харга чедир 89 уруг бар. Кызылдың чыдар эмнелгелеринде 151 уруг чыдар. Тываның Кадык камгалал яамызы ПЦР анализи багай уругларның ада-иелеринге арга-сүмелерни берген. Бир дугаарында, ада-ие дүвүрээзин үндүрбес ужурлуг. Эмчилерниң хайгааралындан көөрге, уругда вирус бар деп дыңнаан соонда-ла, уругнуң байдалы анаа-даа болза, ада-иелер "изиг шугум" телефоннарынче долгап-ла эгелээр бооп турар. Бир эвес назы четпээн кижиниң байдалы бергедеп эгелээр болза, 6-14-24 (Кызылда) азы 8-900-160-0015 (республикада) телефоннарже дыңнадып болур. ПЦР анализи багай болган уругнуң аарыының төөгүзүн эмчи дузазын көргүзери-биле ковид-бригадаже дамчыдар, олар үшкү хүнүнде уругга кээр ужурлуг. Уругнуң байдалын көрүп тургаш, эмнээшкинни томуйлаар. Оон аарыг уругну бажыңынга хайгаараар. Уругларга эмчи дузазын чедирер 24 бригада ажылдап турар, оларның 15-жи соңгаарладып болбас эмчи дузазының бригадалары. Ындыг бригадаларда эмчи база эмчи сестразы ажылдап турар. Чаа төрүттүнген чаштарже, инвалид уругларже база хоочу аарыгларлыг уругларже "арыг" үнүүшкүннүг үш бригада чедип, хынап турар. Аңгы учетта уругларны тускай график-биле эмчилер бөлүү хынаар. Бир эвес херек апарза, 61424, 8900160-0015 дугаарлыг телефоннарже долгааш, чалап болур.