Тываның сайгарлыкчылары аар өртектиг программа хандырылгазын чиигеткен өртек-биле садып ап болур

17.01.2022 Тыва Республика аар өртектиг программа хандырылгазын чартык өртээ-биле садып алыр арганы ажыглаан сайгарыкчылар саны-биле лидер регионнар санында кирген. «Россия Федерациязының чурагайлыг экономиказы» национал программаның «Чурагайлыг технологиялар» федералдыг төлевилел чорудуу-биле Россияның информастыг технологиялар хөгжүдер фондузу деткимчениң хемчеглерин боттандырып турар. Бо хүннерде, РФ-тиң Чурагайлыг хөгжүлде яамызы ада-чурттуң программа хандырылгазын садып алган компанияларга субсидиялар бээр төлевилел күүселдезин түңнээн. Бүгү чуртта биче болгаш ортумак сайгарлыкчы чоруктуң төлээлери бизнести чурагайжыдарын деткээн ол хемчег-биле, ийи айдан эвээш үе дургузунда, программа хандырылгазының (ПХ) 100 муң ажыг лизенциязын садып алганын ведомство дыңнаткан. Чыл төнчүзүнде республиканың биче болгаш ортумак сайгарлыкчы чоруктуң 237 төлээзи программа хандырылгазынга лизенцияны 50 хуу чиигеткен өртек-биле садып алганын Тываның Чурагайлыг хөгжүлде яамызы дыңнаткан. Биче болгаш ортумак сайгарлыкчы чоруктуң субъектилери ол арганы 2022 чылдың апрель 1-ге чедир ам-даа ажыглап болур. Биче болгаш ортумак сайгарлыкчы чоруктуң субъектилери российжи бүдүрүкчүлерниң программа хандырылгазын чартык өртээ-биле алыр деткимчени ажыглап болурун ведомство сагындырган. Федералдыг бюджеттен программа хандырылгазының бүдүрүкчүлеринге лизенция өртээниң 50 хуузун эгидип берип турарындан, чиигелдени кылып турар. Бо хүнде Россияның информастыг технологиялар хөгжүдер фондузунуң https://xn--h1apajh.xn–p1ai/ (рфрит.рф) сайтызында российжи 29 бүдүрүкчүнүң 100 ажыг программа продуктулары салдынган.