Чыл эгезинден Тывага 17 өрт болган, 1 кижи кемдээн

11.01.2022 Декабрь 31-ден январь 9-ка чедир, өртчүлер республикага 17 өрттү өжүрген, оттан 73 харлыг улгады берген херээжен кижини камгалаан. Өрттерниң хөй кезии - 12-зи Кызыл хоорайга болган. Печканы ажыглап тура, өртке удур айыыл чок чоруктуң дүрүмнерин хажытканы, таакпылап азы бок өрттедип тура, серсмчилел чок болганы – өрттерниң өөскээн кол чылдагааннары ол болган.Эрткен чылдың ол-ла үезинде 22 өрт хыпкан, үш кижи мөчээн.
Россияның Онза байдалдар яамызының Тыва Республикада кол эргелели бажыңга таакпылавас, печка болгаш изидер дериг-херекселдер ажыглаарының дүрүмнерин сагыыр, электри удазыннарын үезинде хынап турар дээн ышкаш, өртке удур айыыл чок чоруктуң дүрүмнерин сагыырын хамаатыларга сагындырган.
Республиканың хамааты камгалал база онза байдалдар албаны өрт үезинде бооп болур айыылдан чайлаарының сүмелерин берген. Өрт өжүрер тускай херекселди саткаш, бажыңда көскү черге быжыглаар. Ханы уйгу үезинде оттуруптар, азы дыңнавас-даа кижиге медээлептер тускай херекселди бажыңга салдырып алыры артык эвес.
Бир эвес өрт болу берзе, өрттен камгалаар албанның «101» азы «112» дугаарларынче долгаар. Оран-савадан бичии уругларны, улгады берген кижилерни, дириг амытаннарны өскээр чайладып, документилерни алыр. Соңгаларны ажытпайн, электрини үзе кезер аргазын көөр. Кывыычал суук чүүлдерни база электрилиг дериг-херекселдерни өжүрерин семевеңер, оларны чүгле элезин, довурак, кургаг чүүлдүг өрт өжүрер херексел-биле өжүрүп болур. Холга туттуна бээр хире чүвелер чок болза, өрттенип эгелээн черни кылын пөс-биле дуй базырып болур.
Бир эвес өрттү өжүрери болдунмас хире болза, ол черден дораан ырай бериңер. Чалынныг изигден база көзүлдес ыштан дезер дизе, үңгеп үне бериңер. Эжииңерни хаапкаш, кожаларыңарга өрт дугайында дыңнадыңар.
Бир эвес бажыңдан үнер арга чок болза, пөстен чаза өттүрүп алгаш, ону өттүр тыныңар! Эжиктерни экидир хаггаш, шупту үттерни өл пөс-биле дуглаптыңар, аргалыг болза, соңга чоогунга туруп алыңар, келген өртчүлер силерни дораан көрүп каар кылдыр.
Эрткен 2021 чылда республика девискээринге 1277 өрт болган, аңаа 20 кижи өлген, 45 кижиниң амы-тыны камгалаттынган.
Онза байдалдар болу берзе, 112 телефонче долгаңар.