Тывада Covid-19-ка удур тарыышкын пунктулары январь 3-те ажылын эгелээр

24.12.2021 Сөөлгү хонуктарда Тывада чаа коронавирус халдавырындан аараан кижилерниң саны хүнде 20-ден эвээжеп, эрткен хүнде 15 кижи аарааны демдеглеттинген. Ындыг болзажок, вакцина алыры оожумнаанын кадык камгалал сайыды Анатолий Югай регионнуң оперативтиг штаб хуралында дыңнаткан. Ол байдалды эдери-биле, 2022 чылдың январь 3-тен эгелеп, чаа чылдың байырлал хонуктарында тарыышкынны эгелээр деп шиитпирни кадык камгалал яамызы хүлээп алганын дыңнаткан.
Covid-19-тан аараан 300 кижи бөгүнде эмнелгелерде чыдар, оларның 73-жү – уруглар, а 7-зи – иштиг херээженнер. Берге байдалдыг кижилерниң саны 51, 13 кижини тындырар аппаратта кошкан.
Барыын-Хемчик кожуунда тарылга оожум чоруп, планның чүгле 79,4 хуузу күүсеттинген. Өске муниципалдыг тургузугларда чоннуң 90 хире хуузун хаара туткан. 60 хардан өрү назылыгларны тарыырынга Кызыл хоорай, Кызыл база Барыын-Хемчик кожууннар хожудап турар.
Росхереглел хайгааралының ТР-де эргелелелинден төлээзи Ольга Монгуш кызыгаарлаан хемчеглерни сагывышаан, ооң күүселдезинге шыңгыы контрольду тургузуп тургаш, коронавирустан аарыыр чорукту чавырылдырып болурун демдеглээн. Хыналдаларны Чаа чылдың байырлал хүннеринде үзүктел чок уламчылаар.
Тываның чазааның регионнуң айыыл чок чоруунуң департаментизиниң тургусканы график-биле үнүүшкүннерни эрге-чагырганың республика болгаш муниципалдыг органнар база корум-чурум камгалаар структуралар ажылдакчыларындан тургустунган рейд бөлүктери кылыр. Тываның баштыңының 2021 чылдың декабрь17-де № 539 чарлыында массалыг хемчеглерни эрттирип болурунга тургускан негелделерни хөй-ниити чемненилге объектилериниң (рестораннар, банкет залдары) күүседип турарынче онза кичээнгейни углаар. Чарлыктың 1-ги пунктузунуң 2-ги иштики пунктузунда, ПЦР-тестизин дужаагаш 48 шак четпээн азы тарыткан дугайында QR-коду бар кижилерни 50 хуу долдургаш, ынчалза-даа 100 кижиден көвүдетпейн, спортчу, культурлуг, ажыл-агыйжы хемчеглерни Тываның Чазаанда оперативтиг штабтан чөпшээреткеш эрттирип болурун айыткан. Республиканың экономиктиг хөгжүлде болгаш үлетпүр яамызының бергени “Covid-19-тан арыг девискээр” деп паспорттуг хөй-ниитиниң чемненилге объектилери хөй кижи чыылган хемчелерни 6.00 шактан 23.00 шакка чедир эрттирип болур.
Культура бажыңнарының ажылынга хамаарыштыр оперштаб кежигүннериниң бодалдары ийи аңгыланган. Росхереглел хайгааралы Культура болгаш туризм яамызынга культура объектилеринге массалыг кандыг-даа чыыштарны эрттирерин хоруурун сүмелээн. Ынчалза-даа хайгаарал органы Тываның найысылалында Национал театр, В.М. Халилов аттыг Тываның күрүне филормониязы, Улусчу чогаадылга бажыңы, Тываның Ойнаар-кыстар театры дээн ышкаш культура одагларынга 25 хуу чедир залдарын долдуруп, ажылдаарын чөпшээрээн болганда, кожуун чурттакчыларының эргелери кызыгдаттынга берген. Чүге дизе суурларда культурлуг дыштаныр чер - чүгле чаңгыс клуб ол. Ам узун, дыштаныр хонуктар келир.. Бо таварылгада байырлал хүннери маажым эртери кандыгыл?.
Культура яамызы биле хайгаарал органнары культура бажыңнарының канчаар ажылдаарын байырлал хүннеринге чедир таарыштырар даалганы алган.
Росхереглел хайгааралының сүмези-биле, школачыларның кышкы дыштанылгазын январь 14-ке чедир узатканын, янзы-бүрү флешмоб, конкурстар, профилактиктиг акциялар база рейдилерлиг “Айыыл чок дыштанылга” республиканың профилактиктиг операциязының планын ведомствонуң кылганын, өөредилге сайыдының албан-хүлээлгезин күүседип турар Алексей Храмцов дыңнаткан.