Тываның Баштыңы чон-биле "дорт чугааны" эрттирер

22.12.2021 Декабрь 25-тиң хүнүнде 17:30 шакта Тыва Республиканың Баштыңы Владислав Ховалыг «Тува 24» телеканалының дорт эфиринге республиканың чурттакчы чонунуң айтырыгларынга харыылаар.

Ол чонну дүвүредип турар айтырыгларга ажык харыыларны бээр.

Кижи бүрүзү салыксаан айтырыын glavatyva.ru сайтыда дыңнадыглар хүлээп алыр тускай хевирге долдургаш чорудар. Бижимел-даа, видео-даа хевиринге айтырыгларны «Вконтакте» социал четкиде болгаш «Вайбер» мессенджерде «Тыва Республиканың Баштыңының онлайн хүлээп алыышкыны» деп бөлүктерже чортуп болур. Албан ёзугаар харылзажылга (чат) - https://clck.ru/WdnB4.

Дараазында төлевир чок телефон дугаарынче база долгап болур - 8 (800) 200 85 16.

Айтырыгларны декабрь 18-тен декабрь 25-те «Дорт чугаа» төнеринге чедир хүлээп алыр.

Чурттакчы чон-биле дорт харылзаа чоннуң ёзулуг аарышкылыг черлерин болгаш берге айтырыгларын билип алгаш, оларны шудургу шиитпирлээр арганы бээр.

Владислав Ховалыгның бир дугаар «Дорт чугаазы» 2021 чылдың август 15-те болган. Ынчан 1208 дыңнадыг кирген. Кижи бүрүзү салган айтырыынга харыыны алган. Дорт эфир үезинде кирген медээлер республиканың Чазааның улаштыр ажылдаар угланыышкыны болган.