Тывада уруглар өөредилгезиниң 113 коллективи бот-аңгылаашкында

07.12.2021 Декабрь 4-түң байдалы-биле алырга, школаларның 58 класстары, уруглар садтарының 11 бөлүктери база дээди болгаш ортумак тускай өөредилге черлериниң 44 бөлүү бот-тускайлаң аңгылаашкынынче кирген. Республиканың өөредилге организацияларындан 1765 кижи кызыгаарлаан хемчеглерде таварышкан.
Ноябрь 28-тен декабрь 5-ке чедир, 32 башкы, школа назыны четпээн өөредилге черлериниң 10 ажылдакчызы база ортумак тускай болгаш дээди өөредилгениң ийи ажылдакчызы COVID-19-тан аараан. Чаа коронавирус халдавырындан школачылар эң хөй аарып турар, неделя дургузунда 76 таварылга бүрүткеттинген. Уруглар садтарындан 14 чаш, студентилерден – 17 кижи аараан.
Республикада коронавирус халдавыры-биле чергелештир, ОРВИ база сезоннуг грипп көдүрүлген. Ылаңгыя школа база садик назынныг уруглар аразында ол нептереп тараан. Өөредилге албан черлериниң удуртукчулары санитар-эпидемиологтуг хемчеглерни сагыырынга хыналданы кошкатканындан байдал нарыыдап келгенин Росхереглел хайгааралының республикада эргелели айыткан. Коллективтерде – школаның класстарында, уруглар садтарының бөлүктеринде база студентилер аразында аарыг нептерээнин республиканың кол санитар эмчизи Людмилы Салчак демдеглээн.
Тыва Республиканың Чазааның даргазының оралакчызы албан-хүлээлгени күүседип турар Александр Брокерт аппарат хуралында, өөредилге черлеринге масканы албан кедеринге, уруглар садтарында чаштарны эртенги шакта хынаарынга, регионнуң школаларында, ортумак тускай болгаш дээди өөредилге черлеринде дезинфекциялаашкынга контрольду күштелдирерин негээн.