Тывада бир кудумчуну Рушевтерниң өг-бүлезиниң ады-биле адаар

02.12.2021 Тываның Баштыңы Владислав Ховалыг бирги профессионал тыва балерина Наталья Ажыкмаа-Рушеваның база ооң кайгымчык салым-чаяанныг чурукчу кызы Надежданың адын мөңгежидер дээн саналды деткээн. Кызылда уругларның хореография школазынга Наталья Ажыкмаа-Рушеваның адын тыпсып, республика найысылалының бир кудумчузун Рушевтерниң өг-бүлезиниң ады-биле эде адаарын шиитпирлээн.
Күш-ажылдың хоочуну, республиканың алдарлыг ажылдакчызы Виктор Дандар Тываның Баштыңынга ындыг саналдыг кирген. Бо чылын Ажыкмаа-Рушева 95 харлаанын сагындыргаш, культураның хөгжүлдезинге киирген ооң ачы-хавыяазынга чөптүг үнелел кылдыр хореография школазынга ооң адын тыпсыры чүүлдүг деп чугаалаан. Надя Рушеваның уран талантызын бүгү делегей билир. «Рушевтерниң өг-бүлези-биле база чогаадыкчы бир коллективке Наталья Дойдаловна Ажыкмаа-Рушеваның адын тыпсыр дээн Виктор Сааяевичиниң саналын дораан-на деткидим. Тываның бирги балериназының адын Кызыл хоорайда уругларның хореография школазы алыр деп коллективтиг шиитпирни үндүрдүвүс» - деп Владислав Ховалыг соцчеткилерде бодунуң арынында дыңнаткан.
Хайыракан суурда уруглар садынга капиталдыг септелге кылыр айтырыгны база хүлээп алыышкын үезинде шиитпирлээн. Уруглар садының эргелекчизи Алена Дагбалдай республика баштыңынга ындыг дилегни киирген. 1984 чылда уруглар садының оран-савазын ажыглалга кииргенден бээр, ону септевээн. Одалга системазында үрелик черлер барындан, кыш кээрге-ле, чүгле 13-14 градус чедир чылыыр.
Владислав Ховалыг байдалды дүрген шиитпирлээри-биле акша-хөреңгини дарый тыварын өөредилге сайыды Алексец Храмцовка база оралакчызы Елена Хардиковага дагзып, мындыг хевирлиг айтырыгларны бир дугаарында тус чер бот-башкарылга органнары шиитпирлээр ужурлуун сагындырган. Тываның Баштыңы даалганың күүселдезин боду хынап, уруглар садынга чедерин аазаан.