Президентиниң грантылар фондузу-биле деткээн 100 шылгараңгай төлевилелдер санынче Тывадан төлевилелдер база кирген

30.11.2021 Президентиниң грантылар фондузу бо чылдың эгезинден бээр, 2020 чылдың төнчүзүнге чедир боттандырган төлевилелдерниң түңнелдеринге ажык-чарлыг демдек салыышкынын чоруткан. Ооң түңнелинде, Президент грантыларының фонд деткиишкини-биле ажылдаан чүс эң экилерин илереткен, оларның санында Тывадан дөрт төлевилел кирген.
Россия Федерациязының Хөй-ниити палатазының, эрге-чагырганың регион органнарының төлээлери, эксперттер төлевилелдерге үнелелди берген. Грант алыкчылары өскелерниң төлевилелдеринге хамаарыштыр ботарының үзел-бодалын илереткен.
Эксперттер база хөй-ниитичилер шупту 4 муң ажыг төлевилелдерни көрген. Ниитизи-биле 28 муң ажыг үнелелдерни, 8 муң ажыг санал-оналдарны алган.
100 эң шылгараңгайлар санынче Тывада боттандырган дөрт төлевилел кирген:
1. Тыва Республиканың аныяк малчыннарының бирги шуулганы.
2. «Хатико» дириг амытаннар камгалаар ниитилел” Кызыл хоорай хөй-ниити организациязының “Буянныг Тыва!” төлевилели.
3. Коммерцияга хамаарышпас фондунуң “Чаңгыс демниг Чеди-Хөл” муниципалдыг социал төлевилели-биле Чеди-Хөл кожууннуң Хову-Аксы суурга буддийжи хүрээни тударынга база ажаап-карактаарынга деткимче көргүскени.
4. “Тывалар делегейи” Тыва республиканың хөй-ниити организациязының «Урянхай-тыва энциклопедия даңзызы» эртем-чырыдыышкын төлевилели.
Оценка.гранты.рф ажык порталдан төлевилелдерниң түңнелдерин база аңаа салган демдектерни көрүп болур. 100 шылгараңгай ажылдарны «топ-100» деп тускай демдек-биле сайтыда айыткан.