Владислав Ховалыг “Листвяжная” уургайынга озал-ондак-биле холбаштыр кажыыдалын илереткен

25.11.2021 Тыва Республиканың Баштыңы Владислав Ховалыг «Листвяжная» уургайга болган озал-ондак-биле холбаштыр Кемерово облазының чурттакчыларынга кажыыдалын илереткен.

«Бөгүн дыка муңгаранчыг медээ дыңналып келди. Кемерово облазының Белово хоорай округунда Листвяжная хөмүр-даш уургайында хөй санныг кижилер амы-тынындан чарылган. Оларны бажыңында өг-бүлелери, чоок кижилери манап турган. Мөчээн шахтерларның өг-бүлелеринге ханы кажыыдалды илереттим. Тыва база хөмүр-даш ажыл-агыйлыг регион болгаш, айыыл-халап бистиң чүректеривиске аары-биле дегген. Чер адаанда арткан кижилер камгалаттынып, өг-бүлелеринге ээп чанып келиринге бүзүреп тур бис. Кемдеп-берттинген кижилер дүрген сегип кээрин, а Кузбасстың чурттакчыларынга сагыш-сеткилдиң быжыын күзедим” – деп, ол бодунуң блогунда бижээн.