Тывада тыва дыл инспекторун томуйлаан

12.11.2021 Ноябрь 9-та «Тыва дыл – чоннуң өнчүзү» деп республика чергелиг VI-гы шуулган болуп эрткен. Аӊаа республиканыӊ эртемденнери, башкылар ниитилели тыва дылдыӊ инспектору деп албан-дужаал тургузарыныӊ дугайында саналды киирген. Тываныӊ Баштыӊы Владислав Ховалыг Республиканың тыва дыл инспектору кылдыр Национал школа хөгжүдер институттуң директору Сайзана Товууну томуйлаан.

Сайзаана Сергеевна Товуу - философия эртемнериниң кандидады. Тываныӊ күрүне университединге кыдат дыл башкылап, республиканыӊ Өөредилге болгаш эртем яамызыныӊ оралакчы-сайыдыныӊ албан-дужаалынга ажылдап турган. Бодунуӊ төрээн дылындан аӊгыда, орус болгаш англи, кыдат дылдарны тергиин эки билир.

«Чиӊгине Директор» деп сеткүүлдүӊ ноябрь айның рейтингизиниӊ «Эртем ажыл-чорудулгазы» деп адырында ол чеди дугаар черни ээлээп алган.

Национал школа хөгжүдер институттуң удуртукчузунга ажылдаан ийи чылдың дургузунда Сайзаана Товуу институттуң сайзыралынга канчаар-даа аажок улуг үлүг-хуузун киирген болуп турар.

Сайзана Сергеевна салган сорулгазын эчизинге чедирер, албан-хүлээлгезин шынарлыг болгаш харыысалгалыг күүседип билир. Ооӊ шылгараңгай болгаш бурунгаар көрүштүг удуртукчу бүдүжүнүӊ ачызында удуртуп баштаан институду элээн көскү чедиишкиннерлиг болуп, эртем ажыл-чорудулгазыныӊ рыногунда төлептиг черни ээлээп алган дээрзин ук сеткүүлде бижээн.