Шериг мөгелер аразынга делегей чемпионадынга киржир спортчуларны илереткен бүгү-российжи хүреш маргылдаазы Тывага болуп эрткен

22.10.2021 Тываның найысылалында «Сүбедей» спорт комплекизинге, Россияның Камгалал сайыдының Кубогу дээш спортчу хүрешке 4 дугаар бүгү-российжи чергелиг маргылдаа болуп эрткен.
Тываның Баштыңы Владислав Ховалыг чурттуң аңгы-аңгы шериг округтарындан келген сес чыынды команданың мөгелеринге байырны чедирген. Маргылдааның тиилекчилери ноябрь төнчүзүнде Иранга болур шериг албанныгларның делегей маргылдаазынга киржир эргени чаалап алырлар.
Төп, Барыын, Чөөн, Мурнуу шериг округтарындан, Агаар-десант шериглериниң, Соңгу-далай флодунуң, Армияның Кызыл туктуг 41-ги ниити-шерииниң база Армияның Төп спортчу клувунуң (ЦСКА) чыынды командаларындан 72 мөге грек-рим болгаш хостуг хүрештерге ачыр-дачыр тудушкан.
Владислав Ховалыг байыр чедириишкининде, бо маргылдаа тыва спортчуларга, хүрештиң хөй санныг көрүкчүлерге улуг хей-аътты бээрин демдеглээн. Ынчангаш аарыкчыларның дилээ-биле маргылдааның онлайн-дамчыдылгазын организастаан. Бүгү Россия маргылдаазын Тыва Арат Республиканың 100 чылдаан оюнда эрттиргени – республиканың чурттакчыларынга улуг белек болган. Алдарлыг чаңгыс чер-чурттуувус Сергей Күжүгетович Шойгуга, Россия Федерациязының Камгалал яамызынга, Армияның Төп спортчу клувунга, Армияның Кызыл туктуг 41-ги ниити-шерииниң удуртулгазынга, Александр Александрович Карелинниң фондузунга болгаш шупту өңнүктеринге улуг деткимчени көргүзүп, республикага спортчу оюннарны сөңнээни дээш, өөрүп четтиргенин илереткен.
Армияның Төп спортчу клувунуң начальниги Артем Громов улуг хемчээлдиг маргылдааны эрттирер арганы бергени дээш өөрүп четтиргенин илередип, маргылдаада делегей, Европа, Олимпийжи оюннар чемпионнары болур алдар аттыг мөгелер киржип турарын дыңнаткан. Тывада ышкаш, спортчу оюннарны улуг кичээнгей болгаш онза хамаарылга-биле эрттирип турар черлерге таварышпаанын, Громов демдеглээн.
Маргылдааның башкарыкчызы РФ-тиң сенатору Александр Карелинниң чаагай күзээшкиннер илереткен чазак телеграммазын номчуп, таныштырган.
Тываның Баштыңы шылгараңгай спортчуларга: 50115 дугаар шериг кезээниң биче сержантызы, грек-рим хүрешке Россияның алдарлыг спорт мастери Адам Куракка, журналист Валерий Плотницкийге, ча адарынга тренер, Россияның алдарлыг спорт мастери Елена Достайга, хостуг хүрешке тренер, Россияның спорт мастери Ай-Даш Самданга, бокска тренер, Россияның делегей чергелиг спорт мастери Саян Санчатка күрүне шаңналдарын тывыскан.
Маргылдааның түңнелинде ЦСКА-ның чыынды командазының мөгелери эң хөй санны алган. Армияның 41 дугаар ниити шерииниң мөгелери оларга сан-биле бичии-ле ойнадыпканнар. Бо маргылдааның чемпионнары, Тегеранга шериглер аразынга делегей маргылдаазынга, бирги чер дээш хүрежирлер. Бистиң чаңгыс чер-чурттугларывыс, хостуг хүрешке делегей чергелиг мөгелер Начын Монгуш, Начын Куулар, Сайын Казырык база тиилекчилер санынче кирген.
Бүгү-российжи дөрткү хүреш маргылдаазының шупту мөгелеринге тураскаал суй-белектерни тудускан.