Тыва дыл хүнүнге тураскааткан Улусчу диктантыны бижиир

20.10.2021 Тывада ноябрьның 1 – Тыва дылдың хүнү кылдыр доктааттынган. Тыва чоннуң культурлуг болгаш сагыш-сеткил өнчүзүнүң чарылбас кезээ, регионда күрүне дылы болур тыва дылды кадагалап, деткип база нептередир сорулга-биле, республика Баштыңы 2016 чылдың январь 18-те Чарлыы-биле Тыва дыл хүнүн тургускан.
Октябрьның 21-де база 28-те, күрүне албан черлери база организациялар ажылдакчылары Тыва дыл хүнүнге тураскааткан улусчу диктантыны бижиир.
ТР-ниң Өөредилге болгаш эртем яамызының Национал школаны сайзырадыр институт диктант киржикчилериниң бижик-билииниң, күрүне дылының дугайында оларның билиглериниң деңнелин хынап, төрээн дылга чугаалажырын база өөренирин кижизидеринге идигни бээр сорулга-биле, диктантыны эрттирип турар.
Улусчу диктант ийи чадага эртер:
• октябрь 21-де - муниципалдыг;
• октябрь 28-те – регионнуу.
Диктантыга киржир дизе, октябрь 20-ге чедир баш бурунгаар чагыгны uluschudiktant@mail.ru адрестиг электроннуг почтаже чорудар.
Ноябрьның 1-ге чедир бижээн ажылдарны хынааш, түңнелдерин үндүрер. Ноябрь 1-де, Тыва дыл хүнүнге тураскааткан “Тыва дыл – чоннуң өнчүзү” VI шуулганның кол кезээнде, диктантының тиилекчилерин шаңнап, демдеглээр.