Чаа вице-премьерлерни томуйлаан

18.10.2021 Тываның Баштыңы В. Ховалыг иштики политика болгаш корум-чурум органнары-биле кады ажылдаар бодунуң оралакчыларын томуйлаан. Халажылгада полковник Тимур Куулар корум-чурум камгалаар органнар-биле кады ажылдажылганы харыылаар.
Куулар Тимур Борисович РФ-тиң ИХЯ Тыва Республикада иштики херектер органнарынга 1996 чылдан бээр албан хүлээлгезин күүсеткен. Кызыл хоорайның кем-херек истээшкининиң бүрүн эргелиг төлээзи бооп ажылдааш, ТР-де ИХЯ-ның оперативтиг-дилээшкин бюрозунуң начальнигиниң оралакчынга чедир депшип ажылдаан. Россияның ИХЯ 2019 чылдың февральда дужаалы-биле, Россияның ИХЯ-зының кадрлар курлавырынче полициялар начальниктери – Россияның ИХЯ территориалдыг органнарының начальниктери база оралакчылары албан-дужаалдыг кирген. Россияның ИХЯ-ның Хүндүлел бижииниң, “Албан-ажылынга шылгарал дээш” медальдың эдилекчизи.

2021 чылдың майдан бээр республика Чазааның херектер башкарыкчызы бооп ажылдап турган Аян Сотпаны иштики политика талазы-биле ТР-ниң Чазак даргазының оралакчызында томуйлаан. Сотпа Аян Кошкен-оолович 1994-2020 чылдарда Тыва Республиканың иштики херектер органнарынга албан-хүлээлгезин эрттирген: дайынчы милиционер база ТР-де ИХЯ-ның ОМОН взводунуң командири, СОБР-ның төлээзи, Улуг-Хем кожууннуң КИХК Шагаан-Арыг хоорайда ИХК начальниги, Чөөн-Хемчик КИХК Чадаана хоорайда ИХК начальниги дээш, өске-даа кожууннарда килдистерни начальниктээн. 1995, 1999, 2000, 2001 чылдарда Соңгу-Кавказ регионнуң девискээринге албан-дайынчы даалгаларны күүсеткен. Полицияның халажылгада полковниги. “Хөй-ниити чурумун камгалаарынга шылгарал дээш” медаль-биле шаңнаткан.
Россия Федерациязының ИХЯ база РФ-тиң ИХЯ Тыва Республикада ведомство шаңналдарының каш дакпыр эдилекчизи.