Владислав Ховалыг Тываның кожууннарында Баштыңның бүрүн эргелиг төлээлер институдун халаар чадавас

15.10.2021 Тываның Баштыңы Владислав Ховалыг кожууннарда бодунуң төлээлерин кызырар деп шиитпирни хүлээп алган. Албан езунуң шиитпирин ТР-ниң Баштыңының Администрация база ТР-ниң Чазак Аппарадының чаартынган тургузуунуң дугайында чарлыкка чарлаар-даа болза, республика баштыңы ону соцчеткиде арыннарда дыңнаткан. Кадрлар чүъгүн өйлеп, дөмейлешкек хүлээлгелерни дүжүрүп, ажылдакчының харыысалгазын улгаттырар ужурлуг деп, ол санаан. «Оларның кол ажылы - чон-биле Тываның Баштыңының, республика Чазааның аразында харылзааны доктаамал тудары турган. Маңаа дугуруштурукчулар херек чок деп бодаар мен. Чуртташтарым-биле бодум ужуражыптар аргам бар. Ол мээң хүлээлгем-дир. Чон-биле кады болуп, оларның үнүн дыңнаар дээш, ажылдаар ужурлуг бис.Амгы үениң технологияларын, гаджеттерин ажыглап, “дорт чугаа” харылзаазы-биле оларның чагыгларын, дилеглерин боттарындан дыңнап база болур апарган» - деп, ол бижээн. Бүрүн эргелиг төлээлер кожуун чагырга даргаларының эрге-байдалын шала бадырып, харыысалганың кызыгаарын арай кошкадып турган деп, Владислав Ховалыг санаан. Ол албан-дужааалды дүжүргенинден, тус чер бот-башкарылга органнарының удуртукчуларының бот-тускайлаңы көдүрлүп, муниципалдыг тургузуг дээш харыысалга улгадыр ужурлуг. Бүрүн эргелиг төлээлер Тываның Баштыңының администрация база чазак аппарадында кирип турарын сагындыраал. 17 кожууннарда база Ак-Довурак биле Кызыл хоорайларда бүрүн эргелиг төлээниң албан-дужаалдарын ээлеп турган 19 кижи кызырылгага таваржыр. «Оларның хөй кезии арга-дуржулгалыг кадрлар, ол биске херек, ынчангаш кижи бүрүзү төлептиг ажылга баар чадавас» - деп, Владислав Ховалыг демдеглээн.