Владислав Ховалыг Күрүне Думазының вице-спикери албан-дужаалда соңгутканы-биле Шолбан Кара-оолга байырны чедирген

12.10.2021 Күрүне Думазы сески чыыжының бирги пленарлыг хуралы болуп эрткен. Ону “Чаңгыс демниг Россия” фракцияның төлээзи  Валентина Терешкова ажыткан. Ол ышкаш Күрүне Думазынче эрте берген политиктиг партияларның төлээлери сөстү алган.  
Саналга комиссиязын, Күрүне Думазының  түр органнарын соңгуур, Регламентиже өскертилгелер киирер база күскү сессияда депутаттарның ажылдаар чурумунуң дугайында айтырыгларны көрген. Күрүне Думазында «Чаңгыс демниг Россия», КПРФ, ЛДПР, «Чөптүг Россия — шын дээш» база «Чаа кижилер» деп беш фракция бүрүткеттинген.
Бирги хуралда Күрүне Думазының даргазын, ооң оралакчыларын, комитеттер база комиссиялар составтарын бадылаан. Күрүне Думазының сески чыыжының даргазы Вячеслав Володин болган. Ооң кандидатуразын  беш фракцияның дөртү бадылаан. Күрүне Думазының даргазының бирги оралакчылары Александр Жуков («Чаңгыс демниг Россия») база Иван Мельников (КПРФ) болган. Күрүне Думазының даргазының оралакчыларынга  Александр Бабаков («Чөптүг Россия — шын дээш»), Алексей Гордеев («Чаңгыс демниг Россия»), Владислав Даванков («Чаа кижилер»), Шолбан Кара-оол («Чаңгыс демниг Россия»), Анна Кузнецова («Чаңгыс демниг Россия»), Сергей Неверов («Чаңгыс демниг Россия»), Петр Толстой («Чаңгыс демниг Россия»), Борис Чернышов (ЛДПР) база  Ирина Яровая («Чаңгыс демниг Россия») соңгуткан.
Тываның Баштыңы Владислав Ховалыг вице-спикер албан-дужаалда соңгутканы дээш Шолбан Кара-оолга байырын чедирген.
«Күрүне ажылында улуг арга-дуржулгаңар, Россияның хамаатыларының сонуургалдарын камгалаарынга инициативтиг болгаш идепкейжи туружуңар чаа албан-дужаалга чедиишкинниг ажылдаарынга үндезин болур дээрзинге бүзүрээр мен.   Биче Төрээн чуртувустуң чедиишкинниг сайзыралынга чугула барымдааларның бирээзи - Төрээн Тывавысты силерниң  деткиириңерде деп идегээр-дир мен” – деп, регионнуң баштыңы демдеглээн.