Кызылдан башкы Светлана Петрова « Россияның чылдың кижизидикчи башкызы» бүгү-российжи мөөрейниң лауреады болган

08.10.2021 Сочи хоорайга эрткен «Россияның чылдың кижизидикчизи-2021» профессионал мергежилдиң бүгү-российжи мөөрейиниң федералдыг чадазында тиилээн 15 лауреаттың аттарын чарлаан. Кызыл хоорайның “Страна детства” 15 дугаар уруглар садының логопед башкызы Светлана Петрова оларның санынче кирген.
Бо чылдың март айда Кызылга эрткен, уруглар садтарының башкылар база кижизидикчилер аразынга мергежилдиң тергиинин шилээн 32-ги мөөрейге, найысылалдың 15 дугаар уруглар садының логопеди Светлана Владимировна Петрова тиилээнин сагындыраал. Кызыл хоорайда уруглар садтарының 15 кижизидикчи башкылары чылдың тулган башкызы ат дээш ынчан мөөрейлешкен турган.
Муниципалдыг база республика мөөрейлериниң тиилекчизи Светлана Владимировна, октябрь 5-те Сочи хоорайга Кызылды төлээлээш, лауреаттың дипломун алган. Россияның назы четпээн өөредилгезиниң 2021 чылда тулган дээн 15 башкылар даңзызынче Кызылдан башкының ады ынчаар кирген. Геленджик курорт хоорайда «Рассвет» өөредилге ажылдакчыларының профэвилелиниң дыштанылга төвүнге дыштаныр путевканы лауреат башкыга тывыскан.
Октябрьның 7-8 хүннеринде башкылар мөөрейиниң ийиги кезээнге боттары киржир. Ында ийи шылгалда бар: «Башкының мастерскаязы» база «Ток-шоу. «Россия» телеканалда «Вести» информастыг программаны эрттирип турар телебашкарыкчы Мария Ситтель ону чорудар. Тиилекчини мөөрейниң ийиги кезээниң түңнели-биле илередир.