Тываның ыраккы суурларында көжүп чоруур ФАП-тар ажылдап эгелээн

29.09.2021 “Газель” автомашинаның баазазында тускай дериттинген чаа көжүп чоруур фельдшер-акушер пункт бо хүннерде Чөөн-Хемчик кожууннуң Ийме суурунче баштайгы үнүүшкүннү кылган.
“Кадык камгалалы” национал төлевилелдиң “Бирги эмчи-санитарлыг дуза чедирер системаны хөгжүдери” төлевилел-биле чаа алган көжүп чоруур ФАП бир дугаар үнүүшкүннү кылган. Регионнуң эмнелге черлеринге көжүп чоруур шупту 18 пунктуну хүлээткен.
ФАП-тың келгени - Ийме суурнуң чурттакчыларынга онзагай болуушкун болган. Көдээ клуб чанынга тургускан автомобильче кижилер чоорту чыглып, эмчи шинчилгезин күзелдии-биле эртип алганнар. Ол хүн көжүп чоруур эмчи бригадазынга терапевт, педиатр база фельдшер ажылдап келген.
Бригада 30 кижини шинчип, 22 кижиге эмчи тайылбырын берген. Суурнуң ийи чурттакчызынга улаштыр эмчилээрин сүмелээн. Бажыңында чыдар, инвалид дөрт кижини эмчилер шинчээн. Тарылга кабинединиң фельдшери Иймениң 30 чурттакчызын коронавируска удур тараан.
Кожуун эмчилери көжүп чоруур ФАП-ты алган соонда, ыраккы суурларже бо-ла үнер апарганын Чөөн-Хемчик төп кожуун эмнелгезиниң улуг эмчизи Шораан Ховалыг чугаалаан. “Дугуй кырында” эмчи пунктузу кончуг таптыг үезинде келген, Covid-19-ка удур тарылга чорударынга дузазын көргүзе берген.