Тываның чедери берге кожууннарынче 11 муң тонна хөмүр-дашты чедирген

14.09.2021 Бо чылын республиканың 13 кожуунунда, чедери берге 30 суурда, 125 социал объектиге одаар чүүлдү садып, чедирер дээш, республика бюджединден 45,5 млн рубльди тускайлаанын Тываның Одалга болгаш энергетика яамызы дыңнаткан. Сентябрь 13-ке чедир, 15356 тонна хөмүр-даш хереглелиниң 76 хуузу, азы 11651 тонназы муниципалитеттерде четкен. Сөөртүлгениң “соңгу чүк” графигинден Мөңгүн-Тайга, Сүт-Хөл база Улуг-Хем кожууннар озалдап турар.
Барыын-Хемчик, Чеди-Хөл, Тес-Хем, Бай-Тайга, Чөөн-Хемчик, Чаа-Хөл база Эрзин кожууннар “кара алдын” сөөртүлгезин дооскан. Бо хүннерде
Кызыл база Каа-Хем кожууннарның социал объектилеринге хөмүр чедирилгезин доозар.
Мөңгүн-Тайгаже хөмүр сөөртүр сайгарлыкчы ажылын графиктен озалдап эгелээнин дыңнаткан. Ол ам хөмүр сөөртүлгезин октябрь 1-де доозар деп, Одалга яамызы дыңнаткан.
Сүт-Хөл биле Улуг-Хем кожуун чагыргалары бо неделяда одаар чүүл чедирилгезин доозарын аазаан.
Республикада хөй ажы-төлдүг өг-бүлелерни “Социал хөмүр” республика төлевилели-биле хандырып турар. 3222 өг-бүле социал деткимчени алыр. А хөмүр одавас черлерде өг-бүлелерге одаар ыяшты дүжүрер. Бо одалга сезонунда 175 өг-бүлени 4,8 куб ыяш-биле хандырар.
Сентябрьның 13-ке чедир 158 өг-бүле, ооң иштинде Эрзинде 78, Чеди-Хөлде 47, найысылалда 33 өг-бүле күрүне деткимчезин алыр. Бажыңнарже «социал» хөмүр чедирилгезин муниципалитеттер организастаар ужурлуг.