Тывада 50 ажыг км муниципалдыг оруктарны септеп чаартыр

13.09.2021 Тываның Баштыңы албан-хүлээлгени күүседип турар Владислав Ховалыгның дилээни-биле, федералдыг бюджеттен Тывада келген немелде акша-хөреңги-биле тус черлерниң 50 хире км оруктарын септеп, үш көвүрүгнү база түр үениң ийи кежиин тудар.
Республика Баштыңының хүлээлгезин күүседип турар Владислав Ховалыг ол сорулгага херек акша-хөреңгини үндүрер дугайында айтыыышкынга атты салган. Ниитизи-биле 378,7 млн рубльди ынаар тускайлаан.
Орук участоктарында септелге ажылдары эгелээн. «Восток» компания Шагаан-Арыг, Чадаана база Туранның кудумчуларында ажылын калбарткан. «Востоктан» аңгыда, кожуун төптери биле сумуларда оруктар септелгезинде хуу сайгарлыкчылар Ужар-оол Иргит, Роман Монгуш база Аяс Сыраттың бригдалары, база «ПГС-Профи» КХН, «ДСТ» бүдүрүлге кооперативи, «Строй-Экспресс» компания биле Абазаның орук тудуг-септелге участогу киржип турар.
Кызыл кожууннуң төвү Каа-Хем суурда орук ажылдарының хемчээли улуг. Крылов, Соболевская, Калинин, Чихачев, Шулуу, Тиилелге, Кучун, Гудилин, Потанин, Докучица кудумчуларда 10 ажыг км орук шывыын өй-тап байдалче киирер.
Шагаан-Арыгда Октябрьская, Улуг-Хемская, Совет Тываның 30 чылы, Сельская, Кызыл партизаннар кудумчуларында ниитизи-биле 2, 5 км узун, 5 хире багай орук участоктарын чаартыр. Хову-Аксының 6 кудумчузунда 2 км ажыг орукту база Сайлыг суурже кирер орукту септээр. Оон аңгыда Каа-Хем, Сүт-Хөл, Тес-Хем, Бай-Тайга, Чаа-Хөл, Барыын-Хемчик, Бии-Хем кожууннарның суурларында оруктар септеттинип-чаарттынар.
Сарыг-Сеп суурнуң Енисейская кудумчузунга чырыкты киирер. Самагалтай, Берт-Даг, Чыргаланды, Шуурмак, О-Шынаа, Ү-Шынаа, Ак-Эрик суурларга база кудумчу чырыктарын киирери планнаттынган. Ак-Эрик, Бажың-Алаак, Мугур-Аксы суурларже кирер оруктарда көвүрүглерни чаартып эгелээр. Арыскан база Владимировка суурларже түр үениң ийи көвүрүүн тудар.