Тываның Чазаа кожууннарда социал объектилерниң капитал септелгезинче акша-хөреңгини тускайлаан

07.09.2021 Тываның Баштыңы албан-хүлээлгени күүседип турар Владислав Ховалыгның муниципалитеттерге сургакчылаашкынының түңнелдери болгаш кожуун чурттакчыларындан кирген чагыглар-биле, ындыг объектилерниң даңзызын тургускан.
Регион Баштыңы албан-хүлээлгени түр када күүседип турар Владислав Ховалыг чай дургузунда Тываның шупту кожууннарынга чедип, ол-ла черинге чидиг айтырыгларны сайгарып танышкан. Капитал септелге база чаа тудуг негеттинип турар элээн каш социал объектилерни демдеглеп алган. В. Ховалыг социал четкилерде бодунуң арыннарынга ооң дугайында, чижээ, Чаа-хөл кожууннуң Ак-Дуруг биле Чаа-Хөл школаларынга, муниципалитеттерде уруглар садтарынга, эмнелгелерге база социал төптерге септелге херегин бижээн.
Тываның Баштыңы албан-хүлээлгениң күүседикчизи кожууннар кезиирин эрткен неделяда дооскан, дыка хөй объектилерде даалгалар күүсеттинип, чамдыктарында ажылдар адакталган. Федералдыг бюджеттен Тывага үндүрген 1,5 млрд рубль акша-хөреңгиниң 120 хире млн-ин социал объектилерниң капитал септелгезинче угландырган.
Тываның Өөредилге болгаш эртем яамызының объектилеринче 100 млн ажыг рубльди август төнчүзүнде шилчиткен. Ак-Дуруг биле Чаа-Хөл школаларында капитал септелге чоруп турар, ында ажылдар сентябрь база октябрь төнчүзүнде доостур. Оон аңгыда чаа септээн албан черлеринге чаа мебельди, столоваяга дериг-херекселдерни садып, химия биле физика кабинеттерин, чурагайлыг лабораторияны дериир.
Тере-Хөл кожууннуң Кунгуртуг суурда уруглар садында, Чаа-Хөл база Каа-Хем кожууннуң Бояровка суурларда уруглар садының одалга системазында капитал септелгелер адакталган. Кызылдың Московская кудумчузунда республиканың немелде өөредилге төвүнге, Балгазын суурнуң школазынга капитал септелгелерни кылыр. Сукпак школазында база Каа-Хем суурнуң эге школазында арыгланыр чылыг черлерни тудуп турар.
Тываның Күш-ажыл болгаш социал политика яамызынга хамааржыр объектилерниң агар болгаш капитал септелгезинче 8 хире млн рубльди шилчиткен. Хову-Аксында хоочуннар база инвалидтерниң бажың-интернадының хеп чуур черин, Өвүр кожууннуң Хандагайты суурда Өг-бүлеге болгаш уругларга социал дуза төвүнүң дээвиирин, Мөңгүн-Тайга кожууннуң Мугур-Аксы суурда Өг-бүлеге болгаш уругларга социал дуза төвүнүң столоваязын, Чеди-Хөл кожууннуң Хову-Аксы суурда Өг-бүлеге болгаш уругларга социал дуза төвүнүң чылыг болгаш суг хандырылга четкилериниң капитал септелгелеринче акшаларны киириштирер. Ол ышкаш Чеди-Хөл кожууннуң Хову-Аксы суурда Өг-бүлеге болгаш уругларга социал дуза төвүнүң оран-савазында агар септелгени кылып турар. Социал дузаның 12 төвүнге уруглар ойнаар база спортчу чаа шөлчүгештерни эптеп тургузарынче акшаны үндүрген.