Тывада Covid-19 дээш киирген кызыгаарлаашкыннарның чамдыызын чоорту суларадыр

03.09.2021 Санитар-эпидемиологтуг албан сагыыр хемчеглер комплекизин арттырбышаан, кызыгаарлаашкынныг хемчеглерни чоорту ап кааптар дугайында Тываның кол санитар эмчизиниң саналынга даянгаш, Тыва Республиканың Баштыңының 2021 чылдың сентябрь 1-де № 319 Чарлыы-биле, культура, спорт база өөредилге албан черлери,  чараштап-шеверлээр адырда ачы-дуза чедирер объектилер ажылын чоорту катап эгелээрин айыткан.
Covid-19-к удур өрээлдерин база дериг-херекселдерин бүрүнү-биле дезинфекциялап, профилактиктиг хемчеглерни сагып турар база шупту ажылдакчылары аарыгга удур тарыдып алган болза, ажылдап болур черлер:
- В. Көк-оол аттыг Национал хөгжүм-шии театры база «Найырал» кинотеатр - олуттарын 25 хуу долдуруп алгаш;
- автошколалар - өөренип турарларның саны 25 хуудан көвүдевес;
- бассейннер, дош чуңгулар - баш бурунгаар бижидилге болгаш абонемент-биле келген кижилерни саны 50 хуудан ашпас;
- тренажер залдары, фитнес-залдар, фитнес-клубтар - баш бурунгаар бижидилге болгаш абонемент-биле келген кижилерни саны 50 хуудан ашпас;
- чараштаныр салоннар, баш таарар черлер, массаж салоннары, маникюр салоннары – баш бурунгаар бижиткен кижилер саны 50 хуудан көвүдевес.
Аалчылар хүлээп алыр бажыңнар, дыштанылга баазалары - кижилер саны 30 хуудан ашпас болгаш, Covid-19-ка удур тарыткан сертификаттыг, азы ковид чок деп анализ харыылыг, чок болза антитела анализиниң харыызы турары албан.
Ажылын катап эгелээн объектилер хөй кижилер чыырын болдурбас.
Кайда болуп турарындан хамаарылга чокка, хөй кижилер чыылган массалыг хемчеглерни, коллектив азы өг-бүле байырлалдарын онза айтыышкын үнгүжеге эрттирери хоруглуг.
Иштиг херээженнер, 65 хардан өрү назылыглар база хоочураан аарыглыг кижилер онза айтыышкын үнгүжеге ырактан ажылдап артар.
Хамаатылар хүлээп алырының дистанциялыг хевирлери - электроннуг интернет-хүлээп алыышкыннар азы почта таварыштыр чорудар ажылдарны 2021 чылдың сентябрь 30-ге чедир узаткан.
Ажыл берикчилери хуралдар, чыыштар эрттирерде, видео-конференцхарылзааны, онлайн-харылзааны база өске-даа дистанциялыг хевирлерни моон-даа соңгаар ажыглап, күш-ажылчы коллективтерге санитар-эпидемиологтуг хемчеглерни сагып артар.
Чарлыктың 4-кү пунктузунда, ковидке удур тарытканын бижээн сертификады чок, анализ харыызы чок, ковидке ПЦР анализи анаа деп справказы үш хонук четпээн, ол ышкаш ковидке антитела анализи 60 хонук четпээн кижилерни чолаачы эргези алыр шылгалдаларже киирбес деп, иштики пунктуну немээн.
Амыдыралга чугула херек шупту объектилерге санитарлыг хемчеглерни сагып турарын хынаан рейдилерни ам-даа чорудар.
Кезээде белен байдал үезинде, хамаатылар база юридиктиг черлер корум-чурум дүрүмнерин сагывас болза, Тыва Республиканың административтиг чурум үрээшкиннериниң дугайында хоойлунуң 3.18 чүүлү-биле административтиг харыысалгага онаажыр.
Тыва Республиканың Баштыңының 2021 чылдың сентябрь 1-де № 319 Чарлыын Тываның Чазааның албан езунуң сайтызында  https://rtyva.ru/content/2718/  «Документы» кезээнден база эрге-хоойлу медээлериниң http://pravo.gov.ru/ албан езунуң интернет порталындан көрүп болур.