Тываның Мөңгүн-Тайга кожуунунда шериг көвүрүгнү туткан

31.08.2021 Төп шериг округунуң Башкирияның инженерлиг аңгы каттыжыышкыны-биле Владимир облазындан шериг көвүрүг тудар бригадазының Тываның Мөңгүн-Тайга кожуунунда туткан көвүрүүн байырлыы-биле ажыткан. Ооң ажыдыышкынынга Тываның Баштыңы албан-хүлээлгени күүседип турар Владислав Ховалыг киришкеш, кызыл кожааны кезип, аар чүък машиналарынга орукту берген.
Тываның Баштыңы албан-хүлээлгениң күүседикчизи бодунуң блогунда чаа туткан көвүрүг кежигниң быжыын демдеглээн: "Дөртен ажыг тонна бо КамАЗ-тар ынаар-мынаар хала чок эрте бердилер».
Иркутск хоорайга Даг Алтайның баштыңы-биле ужуражып тура, ийи республиканы харылзаштырган орук тудуун регионнар бо чоокку чылдарда эгелээр деп дугурушканын дыңнаткан.
Инженер шериглерниң көвүрүглер тудар талазы-биле специалистери тактиктиг-тускай өөредилгелер үезинде Мөңгүн-Тайгада Мөген-Бүрен хемни кежир 80 метр хире узун үш көвүрүгнү база Чөөн-Хемчик кожуунда Чыргакы хемни кежир 20 метрниң ийи көвүрүүн тудар турган. Шериглер ажылды июль эгезинде эгелээш, август 28-те Мөңгүн-Тайга кожуунда Мөген-Бүрен хемни кежир бирги көвүрүгнү дужааган.
Тудуг ажылдарынга Төп шериг округунуң армейжи авиация составында бригада Ми-26 вертолеттар-биле чазып каан МТ-55 аар көвүрүгнү тудуг кылыр черже чедирген. Тудуг ажылдарынга 100 хире шериглер киржип, 20 ажыг инженер техниказын, бульдозерлер, экскаваторлар база автокраннарны ажыглаан.