Бүгү-российжи конкурска Туран хоорайга парк тудар Тываның төлевилели тиилээн

30.08.2021 "Чуртталга бажыңнары болгаш хоорай хүрээлели” национал төлевилелдиң “Таарымчалыг хоорай хүрээлелин хевирлээри” регион төлевилели-биле, чылдың-на биче хоорайларга база төөгүлүг суурларга таарымчалыг хоорай хүрээлелин тудар талазы-биле төлевилелдерниң бүгү-российжи конкурузун чыл санында эрттирип турар. 2021 чылда Бии-Хем кожууннуң Туран хоорайда паркты чаагайжыдар мөөрей чагыын чоруткан.
Тываның Баштыңы албан-хүлээлгени күүседип турар Владислав Ховалыгның Россияның тудуг сайыды Ирек Файзуллин-биле ужуражылгазы төлевилелди бурунгаарладырынга идиглиг болган. Тыва Республикадан Федералдыг Хуралдың Федерация Чөвүлелиниң кежигүнү Дина Оюн Тываның Тудуг яамызының чагыын оон улаштыр шимчедиринге боду киришкен.
Конкурс документациязын белеткээринге ийи төлевилел командазы: регионнуң Тудуг яамызы биле Бии-Хем кожуун чагыргазы кады ажылдаанын, Тываның чазааның Төлевилел ажыл-чорудулга эргелели дыңнаткан. РФ-тиң Чуртталга-коммунал ажыл-агый яамызының хоорай хүрээлели порталынга Тываның чагыы техниктиг болгаш квалификастыг экспертизаны чедиишкинниг эрткен.
2021 чылдың август 25-26 хүннеринде, Нижний Новгород хоорайга “Амыдыраарының хүрээлели: хоорай болгаш суг” бүгү-российжи шуулган үезинде, конкурстуң тиилекчилерин чарлап, Тыва Республиканың төлевилели база оларның аразындазын дыңнаткан.
“Тывага көжүп келген бирги орус хамаатылар парыгы” төлевилел 3 гектар черде төп паркты чаагайжыдып, дараазында ажылдарны кылыр: кижи кылаштаар черлери шывар, ногаанчыдар, парктың төвүн сайзырадыр, баскетбол, волейбол шөлдерин тургузар, мини-стадионну тудар, өгнү тигер, роллердром шөлүн салыр.