Тываның өөредилге адырында кадрлар чедишпезин шиитпирлээр арга-хевирлерни ажылдап кылыр

23.08.2021 Республиканың өөредилге организацияларынга 260 хире башкы кадрлар чедишпес. Тываның Өөредилге болгаш эртем яамызы август 17-де ындыг медээни берген. Найысылалда – 59, Бии-Хем кожуунда – 39, Чөөн-Хемчикте – 29, Улуг-Хемде – 26 хостуг олуттар бар. Математика, орус дыл болгаш литература, англи дыл болгаш физика башкылары школаларга дарый херек.
Өөредилге болгаш эртем яамызы башкы эртеми чок, мергежилдиг кадрларны школага ажылдаар кылдыр хаара тудары-биле, “Педагогика өөредилгези: ниити өөредилге организациязының башкызы (эртем)” угланыышкынга дээди эртемниг специалистерге ниитизи-биле 262 шак өөренир профессионал эде белеткел программазын ажылдап кылган.
Бир чылда үш сессиялыг хүндүскү-бот-өөредилгени эрткен, доозукчу квалификация ажылын камгалаар. Курстуң дыңнакчылары ийи ай иштинде өөредилге (бүдүрүлге) практиказын эртер.
Тываның билиг-мергежил бедидер институттуң баазазынга эде белеткел курстарын бюджеттиг үндезинге, 2022 чылдың январьдан июньга чедир, азы бюджеттен дашкаар үндезинге 2021 чылдың сентябрьдан декабрьга чедир, а бүдүрүлге практиказын 2022 чылда эрттирер кылдыр планнаан.
Тываның Баштыңының албан-хүлээлгезин күүседип турар Владислав Ховалыг республиканың өөредилге адырында башкыларның чедишпезин шиитпирлээри-биле, башкыларга материалдыг деткимче көргүзер регион программазын ажылдап кылыр даалганы Өөредилге болгаш эртем яамызынга берген. Ол программа “Көдээ черниң доктору” федералдыг программа ышкаш, ыраккы көдээ школаларга ажылдаар мергежилдиг башкыларны хаара тудар чогумчалыг болгаш дээштиг арга апаар.