Россияның Күрүне тугунуң хүнүнде бичии кызылчыларга паспорттарны тывыскан

Россия Федерациязының Күрүне тугунуң хүнүнде, Тываның найысылалы Арбат шөлүнге, Россия Федерациязы биле Тыва Республиканың Күрүне туктарын байырлыы-биле киискидер езулал болган. Ук езулалга Тываның Баштыңы албан-хүлээлгени күүседип турар Владислав Ховалыг, Дээди Хуралдың (парламент) даргазы Каң-оол Даваа база Тыва Республикада кол федералдыг инспектор Александр Вавилихин Россияның бүрүн эргелиг хамаатылары болган элээдилерге паспорттарны тывыскан.

Республиканың бирги удуртукчулары Россия Федерациязының хамаатызы болганының кол документизин Кызылдың школачылары - Тываның республика лицей-интернадының 8-ки классчызы Тамирлан Соскутка, 17 дугаар школаның 8-ки клазының өөреникчизи Лилия Ооржакка, № 3 дугаар школаның 8-ки классчызы Оюу Тонгул база 17 дугаар школаның өөреникчизи Кирилл Абасовка тывыскан.

Тываның Баштыңы албан-хүлээлгени күүседип турар Владислав Ховалыг күрүне байырлалдары-биле дакпырлажы берген оларның чуртталгазында онзагай хүн-биле оолдар, уругларга байырны чедирип, Төрээн чуртунга ынакшылын болгаш бердингенин боттарының үлегер-чижээ база эки херектери-биле бадыткаар дээрзинге бүзүрелин илереткен.

Узбекистанның хамаатызы, Тывага 2017 чылдан бээр чурттап, ажылдап чоруур Фаизов Марат Радиевич Россия Федерациязынга чурттаар бижикти байырлал хүнүнде алган.

Владислав Ховалыг бодунуң блогунда Россия Федерациязының Күрүне тугу-биле республиканың чурттакчыларынга байырны чедирген:

- Бо байырлал Төрээн чуртувустуң эрткен төөгүзүнге чоргаарлалды база ооң күчүлүг келир үезинге бүзүрелди болгаш патриотчу сүлде-сүзүүн илередип турар. Күрүне тугу аңгы-аңгы омак-сөөктүг, чүдүлгелиг чоннарның күштүг, хостуг болгаш чечектелген чуртувуска чурттаар дээн бүзүрелин каттыштырып турар. Бистиң ниити сорулгавыс — салгалдарга күрүне сүлде-демдектеринге камныг хамаарылганы, чуртувуска болгаш ооң төөгүзүнге хүндүткелдиг болурун кижизидери болур. Хүндүлүг чаңгыс чер-чурттуглар! Силерге амыр-тайбыңны болгаш аас-кежикти, быжыг кадыкшылды база даартагы хүнге турум чорукту болгаш бүзүрелди күзедим.