Кызылга Россия биле Тыаның туктарын көдүрериниң байырлыг езулалын эрттирген

Бөгүн, Республика хүнүнүң байырлалында, Россия Федерациязы биле Тыва Республиканың күрүне туктарын көдүрериниң байырлыг езулалы Чазак бажыңының чанынга болуп эрткен.

Чылдың-на, август 15-те, Тывада республиканың тургустунган хүнүн демдеглеп эрттирип турар. 1999 чылдың февраль 12-де «Тыва Республиканың байырлал хүннериниң дугайында» 143 дугаарлыг Тыва Республиканың хоойлузу-биле байырлалды бадылаан. Августуң 15-те тыва күрүнениң үндезилеттинип тургустунган төөгүлүг хүнү кылдыр Республика хүнүн демдеглээри чаңчылчаан.

1921 чылдың августа Бүгү-Тываның тургузукчу хуралы бот-догуннаан күрүне – Тыва Арат Республика тургустунганын чарлаан. Тыва чоннуң бот-догуннаашкынын деткээн Россия ол болуушкуннуң белеткелинге үлүг-хуузун киириштирген.

А 1944 чылдың октябрь 11-де ССРЭ-ниң составынче РСФСР-ниң автономнуг облазы кылдыр эки-тура-биле каттышкан.

Тыва Республика Хүнүн байырлаары-биле август 16-ны ажылдавас хүн кылдыр чарлаанын сагындыраал.