Октябрьның 14-15 хүннеринде Тывага тудуг талазы-биле бирги шуулган болуп эртер

09.08.2021 Тываның Чазаа-биле кады Енисей Сибири хөгжүлде корпорациязы, октябрьның 14-15 хүннеринде Кызылда Аныяктар ордузунга, тудуг талазы-биле  бирги шуулганны чыыр.
Ийи хүннүң дургузунда, специалистер тудуг адырынга чурагайлыг технологияларны ажыглаарының, тудугнуң хуусаазын кызырарының, материалдар бүдүрүлгезинге чаа аргаларны ажыглаарының, таарымчалыг хоорай хүрээлелин хевирлээриниң, республиканың ук адырында сайгарлыкчыларны деткиириниң дугайында сайгаржып чугаалажырлар.
Тываның чаа архитектура-тудуг политиказында чугула айтырыгларны сайгарарынга шуулган өзек шөлдү ээлээр. Ону эрттирер дээш Аныяктар ордузунга тускай студияны дерип салыр. Аңаа пленарлыг хуралдар, дугуржулгаларга ат салыышкыннары, стратегтиг сессиялар база түңнел чыыш ажылдаар. Россияның өске хоорайларындан эксперттер онлайн-чурум-биле дискуссияның ажылынга коштунуп болур.
Баштай шуулганны август айда планнап турганын сагындыраал, ындыг болзажок, COVID-19-биле эпидемиологтуг байдал нарыыдай бээрге, ону күсче чылдырган.