Тываның найысылалының хоорай кыдыында чаа школазынче 308 биргиклассчылар бижиткен

06.08.2021 “Өөредилге” национал төлевилел-биле Кызыл хоорайның солагай талакы дачалар ниитилелинде туткан амгы үениң школазы бо чаа өөредилге чылында ажыттынар. Өөредилге черинде 25 өөреникчиге таарыштырган 33 класс-комплектиге 825 кижи өөренип эгелээр. Бөгүнде 18 дугаарлыг чаа школазының эргинин артап киреринге 308 биргиклассчылар бижиттирген.
Объектини ажыглалга кииргени-биле, хоорай школаларының чүъгү чүгээртеп, үш сменага өөренир деп айтырыгны чок кылыр. ЛДО районунуң чурттакчыларынга ол үрде манааны болуушкун болур, чүге дизе оларның ажы-төлү хоорайже өөренип, таарымчалыг эвес байдалдарда аргыжып чоруп турган.
Кызыл хоорай мэриязының өөредилге департаментизи бо өөредилге чылының төнчүзүнде, ЛДО-да чаа школаже шилчидип алыксап турар өөреникчилерниң санын тодартакан. 18 дугаарлыг школаже хоорайның өөредилге организацияларындан 1245 өөреникчи, азы шупту өөреникчилерниң 49,4% шилчип чоруур болган.
2021 чылдың апрель 1-ден найысылалдың өөредилге департаментизи ЛДО-да чурттап турар келир үениң чаңгысклассчыларының ада-иелеринден (хоойлу езугаар төлээлеринден) билдириишкиннери хүлээгеш, бүрүткеп эгелээн. 2021 чылдың август 3-ке чедир 308 билдириишкин кирген.
«Үрде манаан школа ажыдыышкыны – эң өөрүшкүлүг болуушкун. Чаа өөредилге чылында ол ажылын эгелээрин шупту четтикпейн манап тур бис. Чамдык кижилер ооң болу бээринге бүзүревейн-даа турган чадавас. Ынчангаш школа ажыдыышкыны бистиң микрорайонну оттуруп, байырлалды шуптувуска албан сөңнээр!» - деп, ол черниң чурттакчызы, школачы уругнуң ачазы Таймир Кужугет өөрүшкүзүн үлешкен.
Регионда «Өөредилге» национал төлевилел боттаныышкыны-биле, Кызыл хоорайга ам-даа ийи школаны, уруглар садтарын тударын, көдээ школаларга капиталдыг септелгени кылырын, республиканың ыраккы кожууннарында школаларга спортчу шөлдерни септээрин планнаан.
2021 чылдың август 4-ден эгелеп, 18 дугаар школаның администрациязы, ада-иелерден (хоойлу езугаар төлээлерден) уругларын 2-ден 11 классче киирерин дилээн билдириишкиннерни Кызыл хоорайның Пригородная кудумчузунда, 8 дугаар бажыңда хүлээп турар. Билдириишкиннерни 2021 чылдың сентябрь 5-ке чедир хүлээр.