Тываның хан-дамыр төвү чартыктаан кижилерниң кадыкшылын катап быжыглаар дериг-херекселдерни алган

03.08.2021 “Кадык камгалал” национал төлевилелдиң “Чүрек-дамыр аарыглары-биле демисежири” федералдыг төлевилел шугуму-биле, сөөлгү ийи чылда, республиканың 1 дугаар эмнелгезиниң регионнуң хан-дамыр төвү хан эргилдезиниң аарыгларын шинчилеп, эмнээр амгы үениң 15 аппарадын алган деп, Тываның Кадык камгалал яамызы дыңнаткан. Чартыктаан кижилерни комплекстиг эмнээри-биле, реабилитация хемчеглериниң чаа аргаларын ажыглап эгелээр. Бо чылын ол эмнелге черинде 8 дериг-херексел келген, ооң үжүн ам эптээр. Ол аппараттар мээниң хан эргилдези өскерилген аарыг кижилерге эмчи реабилитациязын көргүзеринге дузалыг. Ол ышкаш неврология аарыгларындан халажырап чоруур кижилерни эмнээринге ажыглаар. Дүрген дамчыыр электромагнит идик-хеп өттүр баш сөөгү болгаш чымчак эъттерже кирип, өске арга-биле эмнээри болдунмас эмнээшкинни болдурар. Аарышкылыг черлерни, чугаазын, шимченирин хандыр шинчилээринге стимулятор ажыктыг. Бо чылдың бирги чартыында хан-дамыр төвүнге 392 кижи эмнээшкинни эрткен. Оларның 158-зи чартыктаан кижилер болуп турар.