Тывада Covid-19-биле холбашкан элээн каш кызыгаарлаашкыннарны сулараткан

02.08.2021 Тываның Чазак Даргазының оралакчызы – регионнуң экономика сайыдының албан-хүлээлгезин күүседип турар Айдыс Сат Тывада коронавирус хамчыындан аарыыры чавырлып эгелээнинден, бизнес адырында кызыгаарлаашкынныг хемчеглериниң чамдыызын кошкадып эгелээнин дыңнаткан.
Кызыгаарлаашкынны суларадырының бирги чадазында, албан кылыр негелделерни сагып турар болза (санитайзерлерниң бары, өрээлдерни агаарладып, арыглап турары), садыг төптери база үүрмектеп садар объектилерниң ажылын катап эгелээр. Оон аңгыда, хереглекчиниң булуңунга коронавирус хамчыын тарадып-нептеретпезиниң профилактиктиг бүгү хемчеглерин, санитар-эпидемиологтуг нормаларны, өрээл иштинге кижилер санын сагыыр хемчеглер чурумун чара бижип, таныштырар. Спа-салоннарның, чараштаныр черлерниң база мастерлерниң ажылын чөпшээрээн. Баш бурунгаар бижидилге-биле чонну хүлээр болгаш, 25 хуудан көвүдевес ужурлуг деп, Айдыс Сат айыткан.
Бөгүнде 40 сайгарлыкчыдан 12 792 рубль хемчээлдиг 1 МРОТ дээш, база 300 муң рубль чедир хемчээлдиг «Антиковид» микрочээли дээш чеди чагыг Экономика яамызынче кирген. Ол билдириишкиннерниң шуптузун деткээн.
Экономика яамызының санап турары-биле, МРОТ деткимчезинче 2400 хире билдириишкин кирип болур турган, кирген чагыглар саны эвээш-тир деп, чазак даргазының оралакчызының албан-хүлээлгезин күүседип турар А. Сат демдеглээн.
Ам база катап байдал бергедеп, хагдына бербес кылдыр, Росхереглел хайгааралының сүмелээни профилактика хемчеглерин шупту сагыыры чугула деп, сайыт база катап айыткан. Херек кырында көөрге, өске субъектилерде улуг бүдүрүлгелер безин санитар-эпидемиологтуг шупту нормаларны сагып тургаш, халдавырны нептеретпейн турарын көргүскен:
- Бөгүнде ол ажыл-чорудулганың нормазы, а бистиң сайгарлыкчыларывыс ону албан кылыр негелде-дир хүлээп алыр ужурлуг. Ийи неделя иштинде шыңгыы кызыгаарлаашкынны кылганы, сайгарлыкчыларның акшазының хавынга күштүг деггенин билип тур бис. Ынчангаш күрүне-даа, бизнес-даа эпидбайдалдың баксырай бээрин болдурбазы күзенчиг.
Бүдүрүлгелерни ажылдадырының бир чугула негелдези – ажылдакчыларын тарыттырары деп, сагындыраал. Тарылганың бирги кезээн алган ажылдакчыларлыг бүдүрүлгелер ажылдап болур. Ооң мурнунда, антитела бар деп шынзылгалыг ийикпе, азы ПЦР-тестизи бар ажылчыннарлыг бүдүрүлгелерни ажылдаарын чөпшээрээр турган.